TikTok-ზე ბევრი მოწონების მოხვეჭა ზოგჯერ საკმაოდ სარისკო ავანტიურაა, განსაკუთრებით როცა შენი ოთახის თანამცხოვრები ყველაზე უდროო დროს შემოგისწრებს. ბრაისონ გეტცმა ეს სახალისო გაკვეთილი საკუთარ თავზე გამოსცადა.

გეცი სამხრეთ კაროლინის უნივერსიტეტის სტუდენტია და კომიკურ TikTok-ებს ქმნის. ის ხშირად ეხმაურება თავის მაყურებლებსა და კომენტარებს, რომელთაგან ერთ-ერთშიც მას "მოახლე ბიჭის" ტრენდში მონაწილეობის მიღებისკენ მოუწოდეს. გეტცმა "გამოწვევა" მიიღო, მოახლის სამოსი იშოვა და ვიდეოს იდეაც გაუჩნდა: რა მოხდებოდა, ის რომ ე.წ. "diversity hire-ით" (სამსახურში აყვანის პროცედურა, რომლის დროსაც ასაკს, რასას, სქესსა და სხვა პირად მახასიათებლებს ყურადღებას არ აქცევენ) აყვანილი ბიჭი ყოფილიყო მოახლეების კაფეში?

"და ამ ხუმრობიდან პატარა სცენარი შევქმენი, როგორი შეიძლებოდა გამოსულიყო ვიდეო", — განუცხადა მან BuzzFeed News-ს. ის შეეცადა, 15 წამში რაც შეიძლება მეტი ხუმრობა ჩაეტია, ვიდეოსთვის კი მაღალქუსლიანი ფეხსაცმლებიც იგდო ხელთ.

"ვიფიქრე, მაღალქუსლიანების ჩაცმა სასაცილო იქნებოდა, რადგან მე თვითონაც ძალიან მაღალი ვარ და მაღალქუსლიანებს ეს კიდევ უფრო აბსურდულ დონემდე აყავს", — თქვა მან.

თვითონ ტიკტოკიც საკმაოდ სასაცილოა, თუმცა წარმოუდგენლად ზუსტ დროს მეგობრის ოთახში შემოსვლამ და გეტცის ასეთ სამოსში გამოჭერამ ვიდეო ნამდვილ მარგალიტად აქცია:

@nextdreadpirate

Reply to @gothsludge I promise the ending wasn’t staged. The timing was just perfect #comedyskit #comedysketch

♬ original sound - Bryson

ვიდეო უკვე 4.6 მილიონზე მეტჯერ ნახეს. გეტცის თქმით, ის დადგმული არ იყო.

"მეგობრებმა მაღალქუსლიანების გამო წამასწრეს. მომიწია, მისაღებ ოთახში ჩამეწერა ვიდეო, რადგან ჩემს საძინებელში ხალიჩაა და ფეხსაცმლის ბაკუნის სასურველ ხმას ვერ ვიღებდი", — თქვა გეტცმა.

ვინაიდან გეტცი ტიკტოკერია, მეგობარს (და იმის შეყვარებულს, რომელიც ასევე შემოვიდა ოთახში) მისი ამ კოსტიუმში დანახვა მაინცდამაინც არ გაკვირვებია. ცოტა დაიბნა, ნამდვილად, მაგრამ გაკვირვებით — არა.

"პირველ ყოვლისა, მათთვის იმის თქმა მომიწია, რომ ეს ჩაცმულობა ტიკტოკისთვის იყო და არა — სხვა რამისთვის", — თქვა გეტცმა.

გეტცის თქმით, მნახველთა რეაქცია ძალიან მაგარი იყო და ზოგმა ამ სცენის ანიმირება და გადათამაშებაც კი დაიწყო.