რა შეიძლება, გააკეთო საქორწილო ტორტისთვის? აი, ამაზე პასუხი ნამდვილად აქვს ბრაზილიელ დიოგო რაბელოს — მას შემდეგ, რაც საცოლემ მიატოვა, მან საკუთარ თავზე იქორწინა. ექიმი დიოგო და მისი კოლეგა, ვიტორ ბუენო, გასული წლის ნოემბერში დაინიშნენ და ერთი წლისთავზე ქორწილიც დაგეგმეს, თუმცა...

ივლისში ვიტორმა არგუმენტების კასკადი გადმოულაგა საქმროს, რატომ არ სურდა მასზე დაქორწინება. ასეთ დროს წყვილების უმეტესობა ალბათ საშინლად უსიამოვნო სიტუაციაში აღმოჩნდებოდა, მაგრამ დიოგომ გადაწყვიტა, მისი ცხოვრების ერთ-ერთი უმნიშვნელოვანესი დღე არ ჩაეშალა და ყველაფერი გეგმის მიხედვით წასულიყო; ცხადია, ერთი გამონაკლისით — ქორწილში პატარძალი არ გამოჩნდებოდა.

ასეც მოხდა. 17 ოქტომბერს, თეთრ სმოკინგში გამოწყობილი 33 წლის დიოგო საკუთარ თავზე დაქორწინდა ბაიას შტატის ჩრდილოაღმოსავლეთით, კურორტ იტაკარეზე. ცერემონია, რომელსაც 40 სტუმარი დაესწრო — რასაკვირველია, არცერთი მათგანი ვიტორის მხრიდან — რაბელოს 350 ათასი ბრაზილიური რეალი ($63 ათასი) დაუჯდა.

"დღეს ჩემს ცხოვრებაში ერთ-ერთი ყველაზე ბედნიერი დღეა, რადგან საყვარელ ადამიანებთან ერთად ვარ და ვზეიმობ იმას, რაც, შესაძლოა, ტრაგედია ყოფილიყო, თუმცა მე კომედიად ვაქციე", — ამბობს დიოგო.

ინსტაგრამის საკუთარ ანგარიშზე გამოქვეყნებულ ქორწილის ვიდეოს 140 ათასზე მეტი ნახვა აქვს, გამომწერები კი დიოგოს გაბედნიერებას ულოცავენ.

დიოგოს ქორწილის სტუმრები.

ფოტო: drdiogorabelo / Instagram

ჟურნალისტებთან საუბარში დიოგომ აღნიშნა: "სიტუაციას ერთი თვის განმავლობაში ვიაზრებდი და გადაწყვიტე, საკუთარი თავი დამეფასებინა და შემეყვარებინა. ცერემონიამ კი 50-ის ნაცვლად 40 სტუმრით ჩაიარა.

"ამით ხალხისთვის იმის თქმა მინდა, რომ ბედნიერება ქორწინებაზე არაა დამოკიდებული. რასაკვირველია, მსურს, ოჯახი და შვილები მყავდეს, თუმცა ჩემს ბედნიერებას ეს არ განსაზღვრავს", — დასძენს რაბელო.

სოლოგამიის, იგივე თვითქორწინების მხარდამჭერები აცხადებენ, რომ ამგვარად ადამიანის თვითშეფასება იზრდება, ამის საპირწონედ კი არსებობს ხალხი, ვინც სოლოგამიას ნარცისიზმს მიაწერს და უარსო ქმედებად მიიჩნევს.