რუსეთის პრეზიდენტის პრეს-სპიკერმა, დიმიტრი პესკოვმა NBCnews-თან ექსკლუზიურ ინტერვიუში აშშ-ს ახლად არჩეულ პრეზიდენტთან, დონალდ ტრამპთან ურთიერთობაზე განაცხადა, რომ ორ ქვეყანას შორის ურთიერთობა მისი ინაუგურაციის შემდეგ გამოიკვეთება:

"ჩვენ მივესალმებით დონალდ ტრამპის ახალ ენასა და საუბრის ტონს, თუმცა, არ ვიცით ზუსტად როგორი იქნება იგი. ვფიქრობ, არავის შეუძლია ამის წინასწარ თქმა".

პესკოვის თქმით, ტრამპი წარმატებული ბიზნესმენია, თუმცა მისი პოლიტიკა განისაზღვრება თეთრ სახლში შესვლის შემდეგ:

"მას შემდეგ, რაც იგი მოქმედი პრეზიდენტი გახდება, მოდით დაველოდოთ, თუ როგორ შეიცვლება მისი ტონი, როგორი გახდება მისი ფრაზები. ყველაფერი იცვლება".

პესკოვის თქმით, ისინი ტრამპს პატივს სცემენ იმის გამოც, რომ მზად არის გაიგოს, რა არის ყალბი და რა - არა. მისივე განცხადებით, დონალდ ტრამპი პრობლემების გადასაჭრელად დიალოგს ირჩევს და არა - კონფრონტაციას. იგი ასევე გამოეხმაურა ტრამპის მიერ გაკეთებულ განცხადებას ISIS-თან დაკავშირებით და თქვა, რომ რუსეთიც მზად იქნება აშშ-სთან ერთად შეებრძოლოს ტერორისტებს:

"ეს სწორედ ის არის, რასაც დიდი ხანია ვეძებდით. ასეთ მიდგომებს ვაფასებთ, მაგრამ დეტალებში, ჩვენ მოთმინებით ველოდებით ინაუგურაციასა და ტრამპის პრეზიდენტის ოფისში შესვლას".