გუშინ, 3 ნოემბერს საკოორდინაციო საბჭოს გადაწყვეტილებით, პირბადის ტარება ყველგან სავალდებულო გახდა, როგორც ღია, ისე დახურულ სივრცეში. წინააღმდეგ შემთხვევაში გათვალისწინებულია ჯარიმა — 20 ლარი.

იმის დასაზუსტებლად, რა შემთხვევაში დაჯარიმდება მოქალაქე, რა სამართლებრივ ბერკეტს გამოიყენებს მთავრობა On.ge მთავრობის ადმინისტრაციას დაუკავშირდა. როგორც პრესსამსახურში გვითხრეს, ღია სივრცეში მოქალაქემ პირბადე უნდა ატაროს ყველგან, განურჩევლად იმისა ხალხმრავალია ადგილი თუ არა.

რაც შეეხება სამართლებრივ რეგულაციას, რომლის საფუძველზეც მოქალაქეებს ჯარიმას გამოუწერენ, პრესსმასახურში გვითხრეს, რომ ამ საკითხს დააზუსტებდნენ, თუმცა დღის განმავლობაში ჩვენს ზარებს არ უპასუხეს.

დღეს, 4 ოქტომბერს გამოქვეყნდა მთავრობის დადგენილება, რომლითაც ცვლილებები შევიდა 2020 წლის 15 ივნისის დადგენილებაში პირბადის ტარების წესის შესახებ. კერძოდ, პირველი მუხლი ჩამოყალიბდა შემდეგი რედაქციით.

"ეს წესი განსაზღვრავს პანდემიის ან/და ეპიდემიის დროს ღია ან/და დახურულ საჯარო სივრცეში, აგრეთვე პანდემიის ან/და ეპიდემიის დროს საზოგადოებრივი ტრანსპორტით [მათ შორის, მეტროპოლიტენით] და ტაქსით [M1 კატეგორია] გადაადგილებისას პირბადის ტარების წესსა და პირობებს.

მე-3 მუხლის პირველ პუნქტს დაემატოს შემდეგი შინაარსის "ა1" ქვეპუნქტი:

ღია საჯარო სივრცეში ყოფნისას/გადაადგილებისას".

ფოტო: სქრინშოტი/საკანონმდებლო მაცნე

ინფორმაციის თავისუფლების განვითარების ინსტიტუტში (IDFI) აცხადებენ, რომ Covid-19-თან დაკავშირებული შეზღუდვების დარღვევისთვის გამოყენებული ჯარიმების კონსტიტუციურობაზე მნიშვნელოვანი კითხვის ნიშნები არსებობს. ორგანიზაციის განმარტებით, პარლამენტმა პირბადის ტარების წესის დარღვევისთვის ცალკე სამართალდარღვევა გაითვალისწინა, საიდანაც ცხადად იკითხება, რომ საქართველოს ადმინისტრაციულ სამართალდარღვევათა კოდექსის 42 11 მუხლი არ ითხოვს პირბადის ტარებას ღია სივრცეში და არც აკრძალული ქმედების შინაარსის გაფართოების უფლებას ანიჭებს საქართველოს მთავრობას.

ფოტო: სქრინშოტი/საკანონმდებლო მაცნე

"უფრო კონკრეტულად, საქართველოს პარლამენტმა სამართალდარღვევად მიიჩნია პირბადის ტარების წესის დარღვევა "დახურულ საჯარო სივრცეში", "საზოგადოებრივ ტრანსპორტში" და "ტაქსით" გადაადგილებისას. ამ მუხლის საფუძველზე, მთავრობამ შესაძლოა დააზუსტოს მხოლოდ ტექნიკური დეტალები, მაგალითად, რა არის პირბადე, როგორ უნდა ეკეთოს იგი ადამიანს, რა შემთხვევაში უნდა ეკეთოს დახურულ საჯარო სივრცეში და ა.შ.", — აცხადებენ ორგანიზაციაში.

IDFI-ს შეფასებით, საქართველოს მთავრობა საკუთარ უფლებამოსილებას გასცდა. კერძოდ, მან ექსკლუზიურად ამ ცვლილების მიღებისათვის სამართლებრივ საფუძვლად გამოიყენა ნორმა, რომელიც მას უფლებამოსილებას ანიჭებს დროებით მოაწესრიგოს საკითხი, თუ იგი არ არის მოწესრიგებული საკანონმდებლო აქტით (კანონით).

"რეალურად, აღმასრულებელმა ხელისუფლებამ შესწორება შეიტანა ადმინისტრაციულ სამართალდარღვევათა კოდექსის კონკრეტულად ჩამოყალიბებულ შემადგენლობაში, რაც არ უნდა ჩაითვალოს მოუწესრიგებელი საკითხის დროებით რეგულირებად. კანონმდებლობის ამგვარი განმარტება, განსაკუთრებით, პასუხისმგებლობის დამდგენ ნორმებთან მიმართებით კანონის უზენაესობას, სამართლებრივ უსაფრთხოებას და არაერთ ძირითად უფლებას", — აღნიშნავენ ორგანიზაციაში.

მათივე თქმით, მთავრობამ ხელოვნურად გაზარდა საკუთარი უფლებამოსილება და უხეშად შეიჭრა საქართველოს საკანონმდებლო ორგანოს ექსკლუზიურ კომპეტენციაში. IDFI აცხადებს, რომ ამგვარი ქმედება დემოკრატიული მმართველობისთვის საფრთხის შემცველ პრეცედენტს ამკვიდრებს და არღვევს, როგორც საქართველოს კონსტიტუციას, ისე საკანონმდებლო აქტების მოთხოვნებს.