ძალა ერთობაშიას საარჩევნო ბლოკის წევრის, გუბაზ სანიკიძის თქმით, მასსა და ნიკა მელიას შორის მთავარი არხის ეთერში მომხდარი სიტყვიერი დაპირისპირების შემდეგ მის მიმართ მთავარი საყვედური იყო ის, რომ დრო და ადგილი არ იყო შერჩეული.

"აბა, ნარიყალაზე უნდა ავიდე იქიდან გავაკეთო განცხადება, თუ რა? რას ნიშნავს დრო არაა სწორი? უმორჩილესად ვთხოვ ყველას, ვინც გულშემატკივრობს ოპოზიციას, მიკარნახონ, შემირჩიონ დრო და ადგილი. ეს არის გაუგებარი ამბავი რა. მე ჩემი მოსაზრება ვთქვი", — განაცხადა სანიკიძემ.

გუბაზ სანიკიძის თქმით, მასსა და ნიკა მელიას შორის ეთერის შემდეგ ფიზიკური დაპირისპირება არ მომხდარა.

"ეს თემა გაირკვევა ჩემსა და მელიას შორის და არამგონია, რომ საქვეყნო თემა იყოს იმიტომ, რომ ძალიან ბევრი პრობლემები აქვს ჩვენს ქვეყანას, გაცილებით უფრო სერიოზული. ჩემი და მელიას ურთიერთობა არ არის საკვანძო საკითხი არც ქართულ პოლიტიკაში და ა.შ. სკანდალური იყო, რა თქმა უნდა, და ორივე საკმაოდ განერვიულებულები ვიყავით, მაგრამ მოგვარდება ეს საკითხი. არამგონია მთავარი პრობლემა იყოს ქვეყანაში", — განაცხადა სანიკიძემ პალიტრანიუსის ეთერში.

ერთიანი ნაციონალური მოძრაობის ერთ-ერთ ლიდერს, ნიკა მელიასა და ძალა ერთობაშიას საარჩევნო ბლოკის წევრ, გუბაზ სანიკიძეს შორის სიტყვიერი დაპირისპირება მოხდა. ისინი ერთმანეთს მთავარი არხის ეთერში მას შემდეგ დაუპირისპირდნენ, რაც გუბაზ სანიკიძემ განაცხადა, რომ ბიძინა ივანიშვილს მხოლოდ მიხეილ სააკაშვილის ეშინია. აღნიშნულზე მელიამ განაცხადა, რომ ეს განცხადება ოპოზიციური ერთობისთვის დამაზიანებელი იყო.