"მელია რაიმეთი განსხვავდება ჩვეულებრივი მოქალაქისგან თუ პოლიტიკოსობა არის ინდულგენცია?", — ასე ეხმაურება ქართული ოცნების დეპუტატი, გიორგი კახიანი პროკურატურის მოთხოვნას, რომ ნაციონალური მოძრაობის წევრს, ნიკა მელიას ელექტრო სამაჯურის მოხსნის გამო აღკვეთის ღონისძიება გაუმკაცრდეს.

"წარმოიდგინეთ [ჩვეულებრივმა მოქალაქემ] ზუსტად იგივე დარღვევა რომ ჩაიდინოს, სამაჯური მოიხსნას და გადააგდოს, რა შედეგი მოჰყვება მათთვის? აუცილებლად შესაბამისი, სამართლებრივი შედეგი დადგება. მელია რაიმეთი განსხვავდება ჩვეულებრივი მოქალაქისგან? თუ პოლიტიკოსობა არის ინდულგენცია? პოლიტიკურად თუ მკითხავთ, ვისურვებდი, რომ არანაირი სამართლებრივი რეაგირება მასზე არ მოხდეს, იმიტომ, რომ ყოველგვარი რეაგირების გარეშე იგი უნდა დამარცხდეს არჩევნებში და ეს აუცილებლად მოხდება, მაგრამ სამართლებრივი თვალსაზრისით თუ მეკითხებით, კანონის უზენაესობა გულისხმობს იმას, რომ ყველა პასუხისმგებელია კანონის წინაშე", — განაცხადა კახიანმა.

პროკურატურა ნიკა მელიასთვის აღკვეთის ღონისძიების გამკაცრებას ითხოვს. მათი განცხადებით, მელიამ სამაჯურის მოხსნით აღკვეთის ღონისძიებები დაარღვია და უფრო მკაცრი ღონისძიებით სასამართლოს სწორედ ამიტომ მიმართეს.

აღკვეთის ღონისძიების შეცვლის შესახებ პროცესი დღეს 5 საათზე თბილისის საქალაქო სასამართლოში გაიმართება.

1 ნოემბერს ნაციონალური მოძრაობის ლიდერმა, ნიკა მელიამ საპროტესტო აქციაზე ელქტროსამაჯური მოიხსნა. როგორც ის ამბობს, სამაჯურის ტარებას აღარ აპირებს.

"ეს არის უსამართლობის სიმბოლო. ეს არის ძალადობრივი სამაჯური, რომელსაც მე აღარ შევიბამ. გამორიცხულია. ზუსტად ვიცი, ვიჯდები მე ციხეში თუ ვიქნები თქვენთან ერთად იმ ბრძოლაში უახლოეს დღეებში, ერი გაიმარჯვებს", — განაცხადა ნიკა მელიამ.