სტრატეგია აღმაშენებლის წევრი, თაკო ჩარკვიანი ამბობს, რომ პარლამენტის მანდატზე უარს იტყვის. მისი თქმით, ასეთი არჩევნების პირობებში ამ მანდატით პარლამენტში შესვლა სამარცხვინოა.

ამასთან, ჩარკვიანი ამბობს, რომ იგივე ნაბიჯი უნდა გადადგას ოპოზიციამ. მისივე მტკიცებით, მანდატზე უარს პარტიის ლიდერი, გიორგი ვაშაძეც იტყვის.

"მე მოვუწოდებ ყველა ოპოზიციონერს, დღეს შესვლა იმ პარლამენტში არის ქართული სახლმწიფოებრიობისთვის სილის გაწნა. ასეთი ტოტალური გაყალბება, მართლა არ ახსოვს ქართულ საზოგადოებას. ამიტომ ვთვლი, არალეგიტიმურად უნდა გამოცხადდეს და პარლამენტში შესვლას ბოიკოტი უნდა გამოვუცხადოთ", — ამბობს ჩარკვიანი.

ცესკოს პირველადმა შედეგებმა ოპოზიციის კრიტიკა და გაღიზიანება გამოიწვია. პოლიტიკური პარტიის ლიდერები აცხადებენ, რომ არჩევნების შედეგები რეალობას არ ასახავს. გვიან ღამით ისინი ცესკოს ოფისთან შეიკრიბნენ და გააპროტესტეს. ადგილზე მობილიზებული იყო პოლიცია.

დღეს, პირველ ნოემბერს 16:00 საათზე ოპოზიცია საპროტესტო აქციას გეგმავს, სადაც გაჟღერდება მათი გეგმებისა და მოთხოვნების შესახებ.

ცესკოს პირველადი შედეგები მიახლოებულია იმედის დაკვეთით ჩატარებული ეგზტიპოლის მონაცემებთან, რომლის მიხედვითაც, "ოცნებას" — 54%, ენმ-სა და ძალა ერთობაშიას კი 24% აქვს.

გაიგეთ მეტი ეგზიტპოლების შედეგებზე: