საქართველოს პრეზიდენტი სალომე ზურაბიშვილი სამძიმარს უცხადებს საბერძნეთსა და თურქეთს მიწისძვრის შედეგად დაღუპულთა გამო. პოსტები ზურაბიშვილმა ტვიტერზე გამოაქვეყნა.

პრეზიდენტი წერს, რომ უაღრესად დამწუხრებულია მომხდარის გამო, რამაც თურქეთში უამრავი ადამიანის სიცოცხლე იმსხვერპლა.

ის სამძიმარს უცხადებს დაღუპულთა ოჯახებს და აცხადებს, რომ საქართველო მათ გვერდითაა.

ეგეოსის ზღვაში დაახლოებით 7-ბალიანმა მიწისძვრამ ნგრევა გამოიწვია თურქეთსა და საბერძნეთში. საერთაშორისო მედიის ინფორმაციით, მიწისძვრის შედეგად გარდაიცვალა 14 ადამიანი, აქედან 12 თურქეთში და 2 საბერძნეთში.

ამ ეტაპზე ვრცელდება ინფრომაცია თურქეთში 438 დაშავებულის შესახებ. ქალაქ იზმირში ჩამოიშალა 20-მდე შენობა.

ეგეოსის ზღვის სანაპიროზე ძლიერი მიწისძვრა, კუნძულ სამოსის ჩრდილოეთით მოხდა. ამერიკის გეოლოგიური სამსახურის განცხადებით, 7 ბალიანი მიწისძვრა დაფიქსირდა თურქეთის ზღვისპირეთში — იზმირსა და სტამბულში.