ამერიკული სასამართლოს გადაწყვეტილებით, სიკვდილით დასჯიან დილან რუფს, სამხრეთ კაროლინის ქალაქ ჩარლსტონის ეკლესიაში 9 შავკანიანის რასობრივად მოტივირებული მკვლელობისთვის.

BBC-ის ცნობით, სასჯელის გამოცხადების შემდეგ, 22 წლის მკვლელი ფეხზე წამოდგა და ადვოკატების გამოცვლა და საქმის ხელახლა განხილვა მოითხოვა. Fox News-ის ცნობით, მან ასევე ითხოვა სამუდამო პატიმრობა სიკვდილით დასჯის ნაცვლად.

"არ ვიცი, ეს კარგს რას მოგიტანთ" - თქვა მან.

გასულ თვეს დილან რუფი 33 მუხლში სცნეს დამნაშავედ, მათ შორის იყო სიძულვილით მოტივირებული დანაშაული.

2015 წლის 17 ივნისს, 21 წლის დილან რუფმა ეკლესიის გუნდს, რომელიც ბიბლიას სწავლობდა, ცეცხლი გაუხსნა. თავდასხმას 9 ადამიანის სიცოცხლე ემსხვერპლა.

მსჯავრდადებული ჩადენილის გამო სინანულს არ გამოხატავდა:

"თავს ისე ვგრძნობდი, რომ ეს უნდა გამეკეთებინა და ახლაც მგონია, რომ სწორად მოვიქეცი".

დანაშაულის აღიარების შემდეგ, რუფმა პოლიციას განუცხადა, რომ მას რასობრივი ომის წამოწყება სურდა. დილან რუფი რასისტია, რომელსაც სჯერა თეთრკანიანთა უპირატესობის ნებისმიერ სხვა ადამიანზე.