ევროპული საქართველოს საარჩევნო შტაბის ხელმძღვანელის, სერგი კაპანაძის თქმით, 31 ოქტომბერს გაივლება ხაზი განვითარებასა და ჭაობში დარჩენას შორის, ერთპიროვნულობასა და მრავალპარტიულ, დემოკრატიულ მმართველობას შორის და ამ ყველაფერს გადაწყვეტს ქართველი ამომრჩეველი.

"ასე ხდება, როდესაც ხელისუფლება არ უსმენს ხალხს და მარტო თავის თავს უსმენს; როდესაც ხელისუფლება უსმენს მარტო ერთ ადამიანს; როცა ფიქრობს მარტო თავის თავზე; როცა არაფერს აკეთებს იმისთვის, რომ ქვეყანა წავიდეს წინ; ასე ხდება და ასე იკრიბება ბევრი ადამიანი ბევრ ადგილზე და გამოხატავს თავის ბრაზს და იმედს, რომ ეს ხელისუფლება დამარცხდება და ეს ხდება ახლა აქ, რესპუბლიკის მოედანზე. მხოლოდ რამდენიმე დღე დარჩა მანამ, სანამ ჩვენ ყველა დავიწყებთ ბრძოლას უკეთესი საქართველოსთვის და ქვეყანას წავიყვანთ წინ. რამდენიმე დღეში, ჩვენ, ევროპული საქართველო, აუცილებლად დავიწყებთ ეფექტიან ბრძოლას პანდემიის წინააღმდეგ ამ ხელისუფლებისაგან განსხვავებით", — განაცხადა კაპანაძემ.

კაპანაძემ აღნიშნა, რომ 31 ოქტომბერს ქართველი ამომრჩეველი დაანახებს ყველას, რომ ივანიშვილის რეჟიმის დრო ამოიწურა.

"სულ რამდენიმე დღეში, 31 ოქტომბერს, ეს რეჟიმი დაამთავრებს თავის 8-წლიან არსებობას და ჩვენ აუცილებლად წავალთ წინ. ჩვენი ამოცანა იქნება სიღარიბესთან, უმუშევრობასთან და კრიმინალთან ბრძოლა. ჩვენი ამოცანაა, რომ ავაშენოთ ინსტიტუტები და ეს ბოღმა, ღვარძლი, დაყოფა, გათითოკაცება, რომელიც ივანიშვილმა მოიტანა, დავასრულოთ", — განაცხადა კაპანაძემ.

ევროპულმა საქართველომ დღეს, თბილისში, რესპუბლიკის მოედანზე, მოსახლეობასთან შემაჯამებელი შეხვედრა გამართა.