ევროპულმა საქართველომ დღეს რესპუბლიკის მოედანზე მოსახლეობასთან შემაჯამებელი შეხვედრა გამართა.

"ქვეყანაში დაგვიბრუნდა კრიმინალი და ქაოსი - როდესაც ერთმა ავტომატიანმა ადამიანმა შესაძლოა მთელი სახელმწიფო სისტემა დაამარცხოს და თავის ჭკუაზე ატაროს - ეს არის დღევანდელი საქართველო და სწორედ ამ საქართველოს სჭირდება გარდამტეხი ცვლილებები და „ევროპული საქართველო. ხალხს აღარ უნდა ის, რაც ქვეყანაში ხდება ბოლო წლების განმავლობაში, ხალხს აღარ უნდა უკუსვლა, აღარ უნდა გაჭირვება და სიღარიბე, აღარ უნდა უმუშევრობა, უიმედობა, აღარ უნდა მუდმივი დაზაფვრა და პრობლემები ხელისუფლების მხრიდან. საზოგადოებას და ქვეყანას სჭირდება გარდამტეხი ცვლილებები და ჩვენ „ევროპული საქართველო — ნომერი 2, ვართ ის გუნდი, რომელიც მოიტანს ამ გარდამტეხ ცვლილებებს", — განაცხადა დავით ბაქრაძემ.

ბაქრაძის თქმით, ქვეყანაში არსებული კრიზისი და ჭაობი, რომელიც მოიტანა ივანიშვილის ხელისუფლებამ, აუცილებლად დასრულდება 31 ოქტომბერს გარდამტეხი ცვლილებებით.

"31 ოქტომბერი არ არის რიგითი დღე, ეს არ არის ჩვეულებრივი არჩევნები, როცა ადამიანებს აქვთ ფუფუნება აირჩიონ სხვადასხვა არჩევანს შორის, ეს არის გადამწყვეტი არჩევანის დღე, როდესაც წყდება არა პოლიტიკოსების ბედი, არამედ ხალხის ბედი. ეს არის დღე, რომელმაც წერტილი უნდა დაუსვას უკუსვლას, გაჭირვებას და სიღარიბეს, წერტილი უნდა დაუსვას უიმედობას და უპერსპექტივობას, ათი ათასობით ადამიანის უცხოეთში წასვლას ლუკმა პურის საშოვნელად, წერტილი უნდა დაუსვას ხელისუფლებას, რომელმაც ჩამოშალა ინსტიტუტები და დააბრუნა ქვეყანაში კრიმინალი. 31 ოქტომბერს არჩევანი არის სიბნელეს და სინათლეს, განვითარებასა და უკუსვლას, გარდამტეხ ცვლილებებს და ჭაობს შორის", — განაცხადა ბაქრაძემ.

შეხვედრას ესწრებოდნენ პარტიის ლიდერები დავით ბაქრაძე, გიგი უგულავა, ელენე ხოშტარია, გიგი წერეთელი, სერგი კაპანაძე, ხათუნა გოგორიშვილი, ირმა ნადირაშვილი, შალვა შავგულიძე, ნინო გოგუაძე.