პრემიერმინისტრმა გიორგი კვირიკაშვილმა დღეს, 11 იანვრის მთავრობის სხდომაზე, შინაგან საქმეთა მინისტრს დაავალა, გაარკვიოს, თუ რატომ არ უშვებენ ზოგ კაფე-ბარში საქართველოს მოქალაქე კაცებს.

პრემიერის ინფორმაციით, რესპუბლიკის მოედნის ქვემოთ ბარებში ქართველ კაცებს არ უშვებენ. იგი მიიჩნევს, რომ ამ მხრივ, დისკრიმინაციული მიდგომა არსებობს:

"საუბარია იმაზე, რომ ხდება დისკრიმინაციული მიდგომა, როგორც მე ვიცი, ამ ობიექტებში ადგილობრივ მამაკაცებს არ უშვებენ და სამწუხაროდ უშვებენ მხოლოდ მანდილოსნებს. ჩვენ მივიღეთ ანტიდისკრიმინაციული კანონი და სრული კატეგორიულობით ვითხოვ ამ პრობლემის მოგვარებას ჩვენი ქვეყნის სახელმწიფო უწყებებისგან. ყველანაირი რეიდების, ძალადობრივი მეთოდების გარეშე კანონის სრული გამოყენებით და ამოქმედებით, მინდა რომ ეს პრობლემა იყოს მოგვარებული".

რესპუბლიკის მოედნის მიმდებარე კაფე-ბარებში შეშვების მოთხოვნით, კაცებმა საპროტესტო აქცია ჯერ კიდევ 2014 წელს გამართეს, ისინი ამ დაწესებულებების მეპატრონეებს დისკრიმინაციაში ადანაშაულებდნენ, თავად მეპატრონეები კი ბრალდებებს უარყოფდნენ.