გეი პინგვინები დროს არ კარგავენ.

ნიდერლანდების ზოოპარკში მამრი აფრიკული პინგვინების გეი წყვილმა, რომელმაც შარშან ჰეტეროსექსუალი პინგვინების წყვილს კვერცხი მოპარა და საქვეყნოდ ცნობილი გახდა, ამჯერად ლესბოსელთა დუეტის კვერცხს დაეპატრონა, როგორც ეს DierenPark Amsersfoort-მა დაწერა Facebook-ზე.

Dutch News-თან საუბარში ზოოპარკის ცხოველების მომვლელმა სანდერ დროსტმა თქვა, რომ გეი პინგვინები მორიგეობით ასხდებიან კვერცხებს, რათა მუდმივ სითბოში ამყოფონ ისინი. თუმცა, დროსტის თქმით, კვერცხები გაუნაყოფიერებელია და, სავარაუდოდ, არ გამოიჩეკება, რადგან ისინი ლესბოსელი პინგვინების წყვილმა დადო.

წელს, ცოტა უფრო ადრე, დროსტმა RTC Utrecht-თან საუბრისას განაცხადა, რომ მამა-პინგვინები საკმაოდ დომინანტურები იყვნენ:

"სამყოფელში ყველა წყვილს თავისი სახლი აქვს, მაგრამ ეს წყვილი ორ სახლს დაეპატრონა".

წინა წლის ნოემბერში გეი პინგვინებმა ჰეტეროსექსუალთა წყვილს მოპარეს კვერცხი, თუმცა ის არ გამოიჩეკა და გეი წყვილს შვილი ჯერაც არ აღუზრდია ერთად.

"პინგვინების სახეობების უმეტესობა მთელი ცხოვრების განმავლობაში მონოგამიურია და, როგორც წესი, წელიწადში ერთხელ ან ორჯერ ჯვარდება", — თქვა მინესოტის უნივერსიტეტის ეკოლოგიის, ევოლუციისა და ქცევის პროფესორმა მარლინ ზუკმა.

მეცნიერებმა არ იციან, რამდენად ხშირია ერთნაირსქესიანი წყვილები პინგვინებში, რადგან ეს პაწაწინა ქმნილებები ველურ ბუნებაში ყველანი ერთნაირად გამოიყურებიან, თუმცა, ზუკის თქმით, ეს ნამდვილად შეინიშნება ზოოპარკებში.

ეს პირველი შემთხვევა არაა, როდესაც ერთნაირსქესიანმა წყვილმა კვერცხი სხვა დუეტს მოპარა.

ორი წლის წინ დანიის ზოოპარკში გეი პინგვინების სხვა წყვილმა პატარა ბარტყი მოიტაცა, როცა დედამისი ცურავდა. მას შემდეგ, რაც ჰეტეროსექსუალმა მშობლებმა თავიანთი ბარტყის ძებნა დაიწყეს, ის ბიოლოგიურ მშობლებს დაუბრუნდა.

გარდა ამისა, შარშან ივლისში ერთნაირსქესიან პინგვინთა, როკისა და მარამას, წყვილი ცნობილი გახდა იმით, რომ ლონდონის Sea Life Aquarium-ში ბარტყი იშვილა. დედა-პინგვინები რამდენიმე თვის შემდეგ ისევ მოხვდნენ მედიაში მას შემდეგ, როცა მათი 4 თვის ნაშიერი მსოფლიოს პირველი "უგენდერო" პინგვინი გახდა.

ზუკს სჯერა, რომ ერთნაირსქესიანი აფრიკული პინგვინების წყვილს, უბრალოდ, ოჯახის ერთად შექმნა სურს.

"სხვა რომ არაფერი, ურთიერთობაში ყოფნა და ბარტყის ერთად გამოზრდა პინგვინობის ერთ-ერთი საკვანძო ასპექტია", — თქვა მან.

ამავე თემაზე: