ევროპული საქართველოს ზუგდიდის მაჟორიტარობის კანდიდატი გიგი უგულავა ზუგდიდში ბანკის საქმეს ეხმაურება.

უგულავას თქმით, ეს საქმე, ისევე როგორც სხვა საქმეები ივანიშვილის ხელისუფლების პირობებში, ბურუსით არის მოცული და, როგორც უგულავამ აღნიშნა, სწორედ დაუსჯელობა წარმოშობს იმას, რა მდგომარეობამდეც მივიდა დღეს ქვეყანა.

"ფაქტია, რომ რაფალიანცის ბურუსით დაწყებული ინტერვიუდან, ზურაბ ჟვანიას საქმე, რომელიც შემდეგ გაყალბების ობიექტი იყო, შემდეგ იგივე ხორავას საქმე, სადაც იყო გაყალბების ნიშნები, მთელი რიგი საქმეებისა გაყალბებით მიმდინარეობს ამ ხელისუფლების პირობებში, ფაქტია, რომ გამოძიებით ხდება მანიპულირება", — განაცხადა უგულავამ.

მისი თქმით, ის განცხადება, რაც შინაგან საქმეთა სამინისტროსგან ვიხილეთ, მხოლოდ და მხოლოდ კითხვებსა და ეჭვებს ბადებს.

"[ჩნდება ეჭვი, რომ] აქაც გვაქვს ან გაწელვის მცდელობა, რომ არჩევნებამდე იქნება გამოავლინონ, რომ რაღაცას მაინც აკეთებენ, რადგან სხვა შემთხვევაში აბსოლუტურად ლოგიკას მოკლებულია, რომ თუ იცი ადამიანი და ის გაქცეულია, პირიქით, მის ფოტოებს აკრავ და აჯილდოებ საზოგადოებას, ვინც ინფორმაციას მოგაწვდის, ეს ხომ ახალი ველოსიპედი არ არის, ბოლო 3 საუკუნე ასე მუშაობს გამოძიება, ყველა ქვეყანაში ასე მუშაობს და რა გრენლანდია აღმოაჩინა ასეთი და რა მეთოდი აღმოაჩინა ასეთი გომელაურმა", — აცხადებს უგულავა.

უგულავას თქმით, დაუსჯელობა და ფაქტების დამალვა საზოგადოების მხრიდან მხოლოდ გაღიზიანებას იწვევს.

"ამიტომ, ფაქტია, რომ რაღაცას აშკარად მალავს გამოძიება, რაც იწვევს საზოგადოების გაღიზიანებას და დაბნეულობას და შემდეგ უკვე ათას ვერსიას. ეს ჩანს უკვე, ეს ჩანდა წინა არჩევნების წინაც, როდესაც არჩევნებამდე 3 დღით ადრე ააფეთქეს გივი თარგამაძე და მის საქმეზე არანაირი შედეგი არ დამდგარა, იქაც სამხედროები ფიგურირებდნენ. ფაქტია, რომ არავინ არ დასჯილა. ეს დაუსჯელობა, საბოლოოდ, წარმოშობს იმას, სადამდეც მივედით ჩვენ", — დაამატა ევროპული საქართველოს ზუგდიდის მაჟორიტარობის კანდიდატმა.