ევროპული საქართველოს ვაკის მაჟორიტარობის კანდიდატი, ელენე ხოშტარია ხელისუფლებას მოუწოდებს, საკარანტინე სივრცეებსა და თვითიზოლაციაში მყოფი ამომრჩევლების რეგისტრაციის ვადა გაახანგრძლივონ და ყველა პირის რეგისტრაცია უზრუნველყონ, რათა არცერთი მოქალაქის კონსტიტუციური უფლება არ შეიზღუდოს.

მისი თქმით, გონივრული ეჭვი ჩნდება, რომ ცენტრალური საარჩევნო კომისია არეგისტრირებს მხოლოდ საკარანტინე სივრცეებსა და თვითიზოლაციაში მყოფ მხოლოდ იმ პირებს, ვინც მათ აწყობთ.

"გუშინ დაიწყო ეს პროცესი და პირველივე დღეს ჩვენ აღმოვაჩინეთ, რომ ხელისუფლება არ უზრუნველყოფს ადამიანების კონსტიტუციურ უფლებას, რომ მისცენ ხმა. გუშინ, როდესაც დაიწყო რეგისტრაცია, იმ მომენტისთვის, როცა შესული იყო თვითიზოლაციაში მყოფი 467 ადამიანის ზარი, რომელთაც სურვილი ჰქონდათ, დარეგისტრირებულიყვნენ ხმის მისაცემად, მხოლოდ 37 ადამიანი დაარეგისტრირეს, იმ გაუგებარი მიზეზით, რომ ისინი თურმე არ არიან ჯანდაცვის სისტემაში. კეთილი ინებოს სახელმწიფომ და უზრუნველყოს თვითიზოლაციაში მყოფი ყველა ადამიანის საარჩევნო უფლება და თუ ვერ აბამენ ჯანდაცვის სისტემის მოწესრიგებას თავს, ეს არ უნდა მოხდეს ადამიანების კონსტიტუციური უფლების ხარჯზე", — აცხადებს ხოშტარია.

ხოშტარიას თქმით, გამოყოფილი ვადა, 24 ოქტომბრიდან 26 ოქტომბრის ჩათვლით, აბსოლუტურად არაგონივრულია, რადგან ერთი მხრივ, დასაკავშირებლად საკმარისი დრო არაა, მეორე მხრივ კი, იზღუდება მათი კონსტიტუციური უფლება, ვისაც 27 ოქტომბრის შემდეგ მოუწევს თვითიზოლაციაში გადასვლა.