კალიფორნიის ერთ-ერთი ბანკის გარეთ არსებული ბანკომატის ერთ-ერთი ვიზიტორი გაკვირვებული დარჩა, როდესაც ერთ-ერთ დილას ბანკის გახსნამდე შენობის შიგნით ორი დაუპატიჟებელი სტუმარი დაინახა.

ორი ახალგაზრდა და ანცი ენოტი ბანკში შენობის ჰაერსატარი მილებიდან შეიპარა. სამწუხაროდ, ბანკის ჭერის ფირფიტებმა მათ სიმძიმეს ვერ გაუძლო და ორი ფუმფულა მძარცველი შენობის იატაკზე ჩამოვარდა.

ქალაქ რედვუდის ბანკის ოთახებში მყუდროდ მოკალათებულ ოხუნჯ სტუმრებს მალე კალიფორნიის ცხოველთა დაცვა დაადგა თავს:

"ყოველდღე არ ხდება, როდესაც ცხოველთა დაცვის ორგანიზაციას ბანკში შეჭრასთან უწევს გამკლავება, თუმცა ვინაიდან მძარცველები ველური ბუნების ნიღბიანი ყაჩაღები იყვნენ, ეს საქმე სწორედ ჩვენ გვევალებოდა. ბანკის მენეჯერებმა ჩვენი მაშველები შენობაში შეუშვეს და მას შემდეგ, რაც ისინი ენოტებს 10 წუთის განმავლობაში დასაჭერად დასდევდნენ ბანკში, საბოლოოდ მოვახერხეთ, ცხოველები უვნებლად გამოგვექცია შენობიდან. როგორც ჩანს, ბანკის დატოვებად დიდად არ ეპიტნავებოდათ", — განაცხადა კალიფორნიის ცხოველთა დაცვის კომუნიკაციების მენეჯერმა ბაფი მარტინ ტარბოქსმა.

ფოტო: PHS/SPCA

მოქალაქეს, რომელმაც "ძარცვის" შესახებ განაცხადა, თავიდან ეგონა, რომ ბანკის თანამშრომლის დატოვებულ ფუმფულა თოჯინას უყურებდა, თუმცა ენოტებმა მალევე გამოააშკარავეს, რომ ისინი ძალიანაც რომ ნამდვილები და ცოცხლები იყვნენ და დიდი ინტერესით ეთამაშებოდნენ ბანკის მაუსის დასადებებსა და ტელეფონებს, სანამ ფიქრობდნენ, ნეტა ეს სად ჯანდაბაში მოვხვდითო.

"ბანკის გარეთ მდებარე ხეზე პაწაწინა ტალახიანი ნაფეხურები იყო, ამიტომ, როგორც ჩანს, ენოტები ხიდან ბანკის სახურავზე აძვრნენ, მერე როგორღაც ჰაერსატარ მილებში შეაღწიეს და ბანკის ჭერიდან იატაზე ჩამოცვივდნენ. ჭერის რამდენიმე ფირფიტა დამტვრეული დაგვხვდა. ნიღბიანმა მძარცველებმა ასევე ფურცლები მიმოისროლეს და ერთი კომპიუტერიც კი ააყირავეს. საბედნიეროდ, ენოტები დილის თავგადასავლისას არ დაზიანებულან და, რამდენადაც ვიცით, არც თანხა წაუღიათ თან", — თქვა ტარბოქსმა.

ფოტო: PHS/SPCA