ოკუპირებული აფხაზეთის დე ფაქტო უშიშროების საბჭოს მდივნის, სერგეი შამბა აცხადებს, რომ თუ ბანკზე თავდამსხმელმა ე.წ. საზღვარი გადაკვეთა, სოხუმი მას თბილისს გადასცემს. ამის შესახებ მან გამოცემა SOVA-ს განუცხადა.

სერგეი შამბა არარეალურს უწოდებს თავდამსხმელის მიერ აფხაზეთში გადასვლას. დე ფაქტო მდივნის თქმით, რეგიონში სამძებრო სამუშაოები მიმდინარეობს. SOVAS-ს კითხვაზე, დაკავების შემთვევაში გადასცემს თუ არა აფხაზური მხარე დამნაშავეს თბილისს, შამბამ უპასუხა: "რა თქმა უნდა".

ქართულ მედიასაშუალებებში გავრცელდა ინფორმაცია, რომ ზუგდიდის ბანკზე თავდამსხმელი შესაძლოა აფხაზეთში გადასულიყო.

გუშინ, 21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლებს შორის იყო სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. გავრცელებული ინფორმაციით, შეიარაღებულ პირთან მოლაპარაკებებს ის აწარმოებდა.

ამ დროისთვის თავდამსხმელის ადგილმდებარეობის ან ვინაობის შესახებ ინფორმაცია არ ვრცელდება. თავდასხმის დროს საქართველოს ბანკში მყოფი არცერთი პირი არ დაშავებულა.

გაიგე მეტი: