ზუგდიდში, სადაც ამ წუთებში სპეცოპერაცია მიმდინარეობს, დაპირისპირება მოხდა. არიან დაკავებულები. შემთხვევეის ადგილზე სიტყვიერი დაპირისპირება დაიწყო ევროპული საქართველოს ლიდერს, გიგი უგულავასა და გიორგი გაბედავას შორის, რომელიც ჰომოფობიური განცხადებებით გამოირჩევა.

გაბედავას განცხადებით, იქ მისი ბიძაშვილი იმყოფება, რის გამოც იგი უგულავას დაუპირისპირდა და უთხრა, რომ მას აქ ყოფნით საკუთარი თავისთვის "პიარის" გაკეთების უფლებას არ მისცემდა. მოგვიანებით, როცა გაბედავა მედიასთან საუბრობდა, უკნიდან ჩაარტყეს, რის შემდეგაც სიტყვიერი დაპირისპირება ფიზიკურში გადაიზარდა. როგორც ტელევიზიის კადრებიდან ჩანს, ადგილზე ერთი ადამიანი დააკავეს. დაკავებული ამბობს, რომ იგი აქტივისტი არ არის. On.ge შინაგან საქმეთა სამინისტროსგან კომენტარს ელოდება.

ზუგდიდში, საქართველოს ბანკში შეიარაღებული თავდამსხმელი შეიჭრა და მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვს. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. კადრების მიხედვით, შენობაში მყოფთაგან არავინაა დაჭრილი. მოთხოვნების შესასრულებლად თავდამსხმელმა პოლიციას 2 საათი მისცა. მძევლის თქმით, დრო 6 საათზე იწურება.

შინაგან საქმეთა სამინისტროს ინფორმაციით, ზუგდიდში, საქართველოს ბანკში შეიარაღებული პირის შეჭრის შესახებ შეტყობინება დაახლოებით 14:21 საათზე მიიღეს და ამჟამად მიმდინარეობს დამნაშავის გაუვნებელყოფის ოპერაცია. უწყების ცნობით, გამოძიება სისხლის სამართლის კოდექსის 179-ე, 236-ე და 144-ე მუხლებით დაიწყო. ეს მუხლები გულისხმობს ყაჩაღობას, ცეცხლსასროლი იარაღის მართლსაწინააღმდეგო შეძენა-შენახვა-ტარებას და მძევლად აყვანას.