არასამთავრობო ორგანიზაციები კარტოგრაფების საქმეზე დაკავებული კომისიის წევრების, ივერი მელაშვილისა და ნატალია ილიჩოვას გათავისუფლებას ითხოვენ. არასამთავრობოების თქმით, საზღვრის დემარკაციის პოლიტიზაციის მცდელობა განსაკუთრებულ შეშფოთებას იწვევს.

"იგი ამომრჩეველთა ეროვნული და რელიგიური გრძნობებით წინასაარჩევნო მანიპულირებისა და ოპოზიციაზე თავდასხმისთვის ნოყიერ ნიადაგს ქმნის, მაგრამ გამოუსწორებელ ზიანს აყენებს ჩვენს ეროვნულ ინტერესებს", — აცხადებენ NGO-ები.

არასამთავრობო ორგანიზაციები აცხადებენ, გარეჯის თემით უსაფუძვლო სპეკულაციის პარალელურად ანტიაზერბაიჯანული ისტერია ღვივდება, ამ ყველაფერზე პასუხისმგელობა კი მმართველ პარტიას ეკისრება, რომელიც ერთ-ერთ თანამონაწილედ არასამთავრობოები ეკლესიას განიხილავენ.

"მათგან უპირველესი მართლმადიდებელი ეკლესიის ის შავრაზმელი იერარქიაა, რომელიც წლებია იდეოლოგიურ ნიადაგს ამზადებს. ერთმორწმუნე მტრის მეხუთე კოლონა სტრატეგიულ პარტნიორსა და ოკუპანტს შორის ტოლობის ნიშანს სვამს. ცდილობს დაგვიმტკიცოს, რომ სახელმწიფოები, რომლებსაც 100 წლის წინ სტალინმა და ორჯონიკიძემ საქართველოს ტერიტორიები გადასცეს, ისეთივე მტრები არიან, როგორც ის სახელმწიფო, ვინც დღეს ომით იტაცებს ჩვენს მიწას და არ ცნობს საერთაშორისოდ აღიარებულ ჩვენს საზღვრებს", — აცხადებენ არასამთავრობოები.

NGO-ების განცხადებით, აღნიშნული "თამაში" გარეჯის საკითხის მოლაპარაკების გზით გადაწყვეტას სულ უფრო გვაშორებს, ქმნის დაძაბულობას მეზობელ სახელმწიფოსთან და პოტენციურად ეთნიკურ კონფლიქტში გადაზრდის საშიშროებას შეიცავს. მათივე თქმით, ასეთმა მიდგომამ, დაბრუნების ნაცვლად, შეიძლება ისტორიული ძეგლის საბოლოოდ დაკარგვა გამოიწვიოს.

ხელმომწერი ორგანიზაციები:

  • ადამიანის უფლებათა ცენტრი
  • თავისუფლების ინსტიტუტი
  • თანასწორობა 17
  • მმართველობის მონიტორინგის ცენტრი
  • მშვიდობის, დემოკრატიის და განვითარების კავკასიური ინსტიტუტი
  • სამოქალაქო იდეა
  • საქართველოს დემოკრატიული ინიციატივა