პრემიერმინისტრი გიორგი გახარიას განცხადებით, საქართველოში ლოქდაუნის გამოცხადების აუცილებლობა არ არსებობს და ამას ვერც ეკონომიკა გაუძლებს. ამის შესახებ მან საკოორდინაციო საბჭოს სხდომის შემდეგ განაცხადა.

გახარიას თქმით, გაზაფხულზე მკაცრი შეზღუდვები აუცილებელი იყო, რადგან ვირუსის მიმართ დიდი გაურკვევლობა არსებობდა და მოქალაქეებს პირბადეებიც არ ჰქონდათ. თუმცა, როგორც იგი განმარტავს, ახლა სხვა მდგომარეობაა.

"დღეს, როდესაც მთელი მსოფლიო თანხმდება იმაზე, რომ ვირუსთან ბრძოლის ყველაზე ეფექტური საშუალება არის პირბადე, რომელიც 90%-ით ამცირებს დაინფიცირების ალბათობას, რა თქმა უნდა, ჩვენ მსგავს ლოქდაუნს აღარ გამოვაცხადებთ. ამის აუცილებლობა არ არსებობს და ამას ეკონომიკა ვეღარ გაუძლებს", — განაცხადა გახარიამ.

პრემიერის თქმით, იმ პირობებში როცა ვაქცინა უახლოეს მომავალში არ იქნება, ახლა მათ ვირუსთან თანაცხოვრების სტრატეგია აქვთ, რომელიც წერტილოვან შეზღუდვებსა და ბალანსს გულისხმობს.