სულ რაღაც ორი თვე გავიდა, რაც ეს პაწაწინა სისაყვარლე დედამიწას მოევლინა.

აშშ-ის სმითსონის ეროვნული ზოოპარკის პანდის ბელი ცოტა ხნის წინ 8 კვირის გახდა და ნელ-ნელა უფრო და უფრო ბაჯბაჯა და ფუმფულა ხდება:

"გუშინ ბევრად უფრო ბრაზიანი იყო, ვიდრე წინა შემოწმებებზე, და გაზომვისას მყეფარი ხმით ბუზღუნებდა. 7 ოქტომბერს მისი ბოლო აწონვის შემდეგ პანდამ ერთი გირვანქა მოიმატა (0,45 კგ). ახლა მისი წონა 2,47 კილოგრამია. ცხვირის წვერიდან კუდამდე მისი სიგრძე 16.5 დუიმია (დაახლოებით 42 სმ). თუმცა ყველაზე მეტად მუცლის არეში მოსუქდა — მისი აბდომინალური გარშემოწერილობა 13,7 დუიმიდან (34,8 სმ) 15,9 დუიმამდე (40,4 სმ) გაიზარდა — მთელი 2,2 დუიმით (5,6 სმ)!", — დაწერა ზოოპარკმა ბელის ბოლო შემოწმების შემდეგ.

პატარა პუტკუნა პანდა, რომლისთვისაც სახელი ჯერ არ დაურქმევიათ, 21 აგვისტოს გააჩინა დედა-პანდა მეი შანმა — რომლის ნაშიერებს შორისაც ასევე ცნობილი ბელები ტაი შანი, ბაო-ბაო და ბეი-ბეი არიან. მას შემდეგ ის ძალიან კარგად პროგრესირებს. ბელის მოღონიერება დიდწილად დედამისის დამსახურებაა, რომელიც ყველა თავისი ნაშიერისთვის ჭეშმარიტად პროფესიონალი მშობელია.

მეი შანი მთელი ამ დროის განმავლობაში თავის პაწაწინა შვილს თვალს არ აშორებდა და ის მხოლოდ ახლაღა იწყებს მისთვის მცირეოდენი თავისუფლების მინიჭებას — იმის უფლებას აძლევს, რომ ბუნაგში იხოხოს და ხანდახან დედასთან ერთად ცოტა ხნით გარეთაც გაისერნ-გამოისეირნოს.

თავისუფალ დროს ბელი ვაშლის წვენის საწუწნ კანფეტებს მიირთმევს და ახლახან გახელილი თვალებით გარემოს შეისწავლის.