საზოგადოებრივი მაუწყებლის სამეურვეო საბჭოს წევრი, მარინა მუსხელიშვილი ამბობს, რომ მას უკვე დიდი ხანია აღარ ესმის, რას ნიშნავს პოლიტიკურად ნეიტრალური მედია. ამის შესახებ მან On.ge-ს განუცხადა კითხვის - იზიარებს თუ არა, სამეურვეო საბჭოს სხვა წევრების მოსაზრებას, რომ ვასილ მაღლაფერიძე არ არის პოლიტიკურად ნეიტრალური - პასუხად.

„რას ნიშნავს მედია უნდა იყოს ნეიტრალური - ეგ მე ვერ გავიგე, მაგალითს საქართველოში ვერ ვხედავ და თუ ვხედავ, მაშინ ასეთი მედია არის ურეიტინგო, უინტერესო, არა მედია, არამედ დაბალი ხარისხის რაღაცა, შესაბამისად, იქაც ვერ მუშაობს ეს კონცეფცია,“ - განმარტავს მუსხელიშვილი.

On.ge-მ მუსხელიშვილს ასევე ჰკითხა, თუ ვის მისცა ხმა მან გენერალური დირექტორის ასარჩევ კონკურსში და რა კრიტერიუმებით იხელმძღვანელა. სამეურვეო საბჭოს წევრმა, საბჭოს თავმჯდომარის, გრიგოლ გოგელიას მსგავსად, არ გაამხილა ვის სასარგებლოდ გააკეთა არჩევანი. თუმცა, კრიტერიუმებზე თქვა, რომ „საუკეთესო კანდიდატი შეარჩია“:

„ყველაზე კარგად ვინც გაუძღვება ტელევიზიას. 5 ადამიანი იყო, ვინც შესაძლებელი იქნებოდა ამ როლში. ყველას ჰქონდა თავისი პლუსები და მინუსები და მოგეხსენებათ პირველ ტურში ვასიკომ [მაღლაფერიძემ] დააგროვა 4 ხმა, ხო გახსოვთ, და შესაბამისად, გამოიკვეთა მისი უპირატესობა სხვა კანდიდატებთან მიმართებაში და საბოლოო ჯამში გახდა დირექტორი“.

მუსხელიშვილის და გოგელიასგან განსხვავებით, საკუთარი გადაწყვეტილება არ დამალეს სულხან სალაძემ და ქეთი მსხილაძემ. მათ განმეორებით კენჭისყრაზე გენერალური დირექტორის მოვალეობის შემსრულებელს, თიკო ბერძენიშვილს დაუჭირეს მხარი.

დღეს სამეურვეო საბჭომ საზოგადოებრივი მაუწყებლის გენერალურ დირექტორად ვასილ მაღლაფერიძე 6 ხმით აირჩია. სამეურვეო საბჭოს დარჩენილმა ორმა წევრმა მხარი თიკო ბერძენიშვილს დაუჭირა.

ვასილ მაღლაფერიძე, CV-ის მიხედვით, ამ დრომდე უმუშევარი იყო, ბოლოს კი საქართველოს ყოფილი პრემიერ-მინისტრის ბიძინა ივანიშვილი ოჯახის კუთვნილ ტელეკომპანია GDS-ში გადაცემა 2030-ის გენერალურ პროდიუსერად მუშაობდა. მისი მედიაში მუშაობა ტელეკომპანია GDS-ით არ შემოიფარგლება. სხვადასხვა დროს იყო TV9-ის, რომელიც ასევე ბიძინა ივანიშვილის ოჯახს ეკუთვნის, დირექტორის მოადგილე, ჟურნალ კალმასობას მთავარი რედაქტორი, გაზეთ კავკასიონის დამფუძნებელი, რედაქტორი და მთავარი კონსულტანტი. გარდა ამისა, 2 მოწვევის პარლამენტის წევრი, ნაციონალური მოძრაობის ხელისუფლებაში ყოფნის დროს გუბერნატორი და სახალხო დამცველის აპარატის ინფორმაციისა და პოლიტიკის დეპარტამენტის უფროსი.