გირჩის ლიდერი, ზურაბ ჯაფარიძე კომისიის წევრის მიერ არჩევნების დღეს საარჩევნო უბანზე მისულ ამომრჩევლებისთვის სიცხის გაზომვას და ხმამაღლა გამოცხადებას ითხოვს. გარდა ამისა, ამის შემდეგ მისი თქმით, იმავე წევრმა ამომრჩეველს თერმომეტრზე დაფიქსირებული საკუთარი სხეულის ტემპერატურა უნდა აჩვენოს.

ჯაფარიძის თქმით, ამომრჩევლებს საარჩევნო უბანზე საკუთარი თერმომეტრით მისვლაც უნდა აეკრძალოთ.

"საარჩევნო კომისიის წევრმა, რომელიც იქნება რიგის მარეგულირებელი, ყოველ ჯერზე, როდესაც გაუზომავს სიცხეს მოსულ ამომრჩეველს, მისის სხეულის ტემპერატურა უნდა გამოაცხადოს ხმამაღლა, რათა გასაგები იყოს ყველა ადამიანისთვის, ვინც იქნება საარჩევნო უბანზე. მეორე — იგივე წევრმა, როდესაც ჩაატარებს თერმოსკრინინგს, ამომრჩეველს უნდა აჩვენოს თერმომეტრზე დაფიქსირებული მისი სხეულის ტემპერატურა. მესამე — ამომრჩევლებს უნდა აეკრძალოთ საკუთრი თერმომეტრით საარჩევნო უბანზე მისვლა", — განაცხადა ზურაბ ჯაფარიძემ.

გირჩის ლიდერი ითხოვს, რომ ამირან გამყრელიძემ და პაატა იმნაძემ აღნიშნულზე საკუთარი პოზიცია დააფიქსირონ.

"ჩვენ მოვითხოთ, რომ ცენტრალურმა საარჩევნო კომისიამ გაითვალისწინოს ეს რეკომენდაციები და ასევე მოვითხოვთ, რომ ამ პროცედურებთან დაკავშირებით საკუთარი პოზიცია დააფიქსირონ ბატონებმა ამირან გამყრელიძემ და პაატა იმნაძემ", — განაცხადა ჯაფარიძემ.

აღსანიშნავია, რომ ცესკოს მიერ გაწერილ პროცედურებში საარჩევნო უბანზე ამომრჩევლისთვის სიცხის გაზომვა არაა მითითებული, ანუ საარჩევნო უბანზე მისულ ამომრჩევლებს სიცხეს არ გაუზომავენ. ასევე, ისედაც არ არის დაშვებული საარჩევნო უბანზე საკუთარი თერმომეტრით მისვლა.