9 ოქტომბერს, გორის გზაზე ტრაილერის მძღოლმა ავტოსპოტპზე მდგარი ქალი თბილისამდე გაიყოლა, მოგვიანებით კი სექსუალური ხასიათის საუბარი დაუწყო, ფსიქოლოგიურად იძალადა და გაუპატიურებით ემუქრებოდა.

როგორც On.ge-ს ქალის მეგობარი, ნუკა გაბრიჩიძე უყვება, მძღოლი ჯერ ქალს დაუმეგობრდა, ეხუმრებოდა, შემდეგ კი მარიხუანა მოაწევინა და სექსი შესთავაზა. ნუკა ამბობს, რომ წინააღმდეგ შემთხვევაში, გაუპატიურებით ემუქრებოდა.

როგორც ის გვიყვება, მეგობართან ბოლო კონტაქტის დროს ქალმა უთხრა, რომ გორთან, გზატკეცილზე იმყოფებოდა და მარიხუანა მოწია. მისი თქმით, ამის შემდეგ, დაახლოებით, 40 წუთის განმავლობაში მეგობართან კონტაქტი არ ჰქონია, შემდეგ კი მიიღო მესიჯი, სადაც ქალი შველას ითხოვდა.

"მანამდე მიყვებოდა, რა სიტუაცია იყო მანქანაში. მძღოლს გათბობა ჰქონდა ჩართული და ფანჯრები აწეული, მიუხედავად იმისა, რომ სითბო იყო. მოგვიანებით ჩემი მეგობარი მიხვდა, რომ სპეციალურად გააკეთა, რათა უფრო იოლად გაბრუებულიყო და წინააღმდეგობის გაწევის უნარი აღარ ჰქონოდა. უხამსად ესაუბრებოდა და ეუბნებოდა, რას უპირებდა, დასცინოდა, ხანაც პირიქით, ამშვიდებდა, რომ არ შეშინებოდა", — ამბობს ნუკა.

მისივე ინფორმაციით, ქალმა მანქანის გაჩერება და კარის გაღება მოითხოვა, წინააღმდეგ შემთხვევაში, კი გადახტომით დაიმუქრა. ნუკას თქმით, ამაზე მძღოლმა უპასუხა, რომ კარი დაკეტილია და თუ გადახტება, ვერაფერს მიაღწევს, რადგან თავს დაარტყამს და მოკვდება.

ნუკა გვიყვება, რომ ქალი შეშინებული იყო და დახმარებისთვის მას მიმართა. ნუკამ 112-ში დარეკა და აღნიშნავს, რომ პოლიციამ რეაგირება სწრაფად მოახდინა.

"ჩემი მეგობარი პატრულს ტელეფონზე ისე ელაპარაკებოდა, რომ კაცი ვერ მიმხვდარიყო, ვინ იყო, რადგან ეშინოდა, მობილური არ წაერთვა. პატრული ეკითხებოდა, სად იყო, ეს კის და არას პასუხობდა. როცა პოლიციელები მიხვდნენ, რომ შედარებით ახლოს იყვნენ, ტელეფონის იმ ტიპისთვის გადაეწოდება სთხოვეს, მაგრამ იმან არ იცოდა, რომ პატრული იყო და გინება დაუწყო, ვინ ხართო. როცა უთხრეს, რომ პოლიცია იყო და სასწრაფოდ გაეჩერებინა, იმან ჩემს მეგობარზე უპასუხა, გიჟია და რაღაცები მოეჩვენაო. გაუჩერა და ჩამოსვა, თვითონ წავიდა", — გვიყვება ნუკა გაბრიჩიძე.

მისივე თქმით, მძღოლმა მანქანა მცხეთის მიმდებარე ტერიტორიაზე გააჩერა, ქალი ჩამოსვა და თვითონ გზა გააგრძელა. პატრული მალევე მივიდა და ქალი კრიმინალურ პოლიციაში გადაიყვანეს, თუმცა ტრაილერს პოლიცია აღარ გაყვა. ნუკას თქმით, გზაში სამართალდამცავები ქალს დასცინოდნენ და ერთ-ერთმა თქვა — "დღეს უკვე მეასეა მსგავსი საქმე".

პოლიციაში მისვლის შემდეგ, ნუკას მეგობარი ცუდად გახდა და სასწრაფო დახმარება გამოიძახეს. ნუკას თქმით, პოლიციის თანამშრომლები მას დასცინოდნენ და ჰკითხეს, როცა კაცმა სექსზე საუბარი დაიწყო, ეს მან შეთავაზებად მიიღო თუ მუქარად. როგორც ნუკა ამბობს, ქალის პასუხის შემდეგ, რომ ეს მუქარად აღიქვა, პოლიციის თანამშრომელმა დააზუსტა, რომ ეს შეთავაზება იყო.

როგორც ნუკა ამბობს, როცა მცხეთის პოლიციაში ჩავიდა, მოითხოვა, მისი მეგობარი ჯერ არ გამოეკითხათ, რადგან არაფხიზელ მდგომარეობაში იყო. პოლიციისგან კი პასუხად მიიღო, რომ ქალი ზრდასრულია და თავად გადაწყვეტს, როგორ მოიქცეს. მანამდე ქალს ნუკასთვის უკვე მიწერილი ჰქონდა, რომ პოლიციაში ცუდად ექცეოდნენ და დასცინოდნენ, ამიტომ ნუკამ გენინსპექციაში დარეკა. ის აღნიშნავს, რომ ამ ზარის შემდეგ პოლიციაში სიტუაცია გამოსწორდა.

ნუკა და მისი მეგობარი პოლიციამ უკვე გამოკითხა. ქალის უფლებებს ორგანიზაცია საფარი იცავს.

On.ge-ს შინაგან საქმეთა სამინისტროში უთხრეს, რომ საქმეს საქართველოს სისხლის სამართლის კოდექსის 143-ე მუხლით იძიებენ, რაც თავისუფლების უკანონო აღკვეთას გულისხმობს. რაც შეეხება პოლიციელების ქმედებას, უწყებაში ამ დრომდე არ აქვთ პასუხი, დაიწყეს თუ არა ამ ფაქტის შესწავლა.

ნუკას ინფორმაციით, ბრალდებული უკვე დაკავებულია და მისი მეგობარი დღეს ამოცნობაზე წაიყვანეს. შსს-ში აცხადებენ, რომ თუ ამ თემასთან დაკავშირებით თუ რაიმე სიახლე ექნებათ, ყველასთვის ცნობილი გახდება.