ლელოს ისნის მაჟორიტარი დეპუტატობის კანდიდატის, ლანა გალდავას თქმით, სუს-ის განცხადებებით დასტურდება, რომ მას და მისი ოლქის წევრებს უთვალთვალებდნენ. ასე ეხმაურება ის სახელმწიფო უსაფრთხოების სამსახურის განცხადებას, რომელშიც ნათქვამია, რომ ვიდეოკადრებში ნაჩვენები ნომრები არა უწყების, არამედ მათი თანამშრომლის მანქანის საკუთრებაა.

"გავრცელებულ ვიდეომასალაში ნაჩვენები ავტომობილი, სახელმწიფო ნომრით: SZ-303-SZ სახელმწიფო უსაფრთხოების სამსახურის საინფორმაციო ანალიტიკური დეპარტამენტის თანამშრომლის საკუთრებაა.

საშვი, რომელიც დაფიქსირებულია ავტომობილის წინა საქარე მინაზე, გაიცემა სახელმწიფო უსაფრთხოების სამსახურის ავტოსადგომით სარგებლობისათვის, როგორც სამსახურის ბალანსზე არსებული, ასევე თანამშრომლების პირად საკუთრებაში არსებულ ავტომობილებზე", — აცხადებენ სუსში.

ლანა გალდავა მოითხოვს, რომ მოხდეს ვიდეოზე დაფიქსირებული იმ პირების იდენტიფიცირება, რომლებიც მას და მისი ოლქის წევრებს გუშინ ვარკეთილსა და მეტრომშენის დასახლებაში შეხვდნენ. ასევე, ის მოითხოვს, დაიწყოს გამოძიება.

"თუ მანქანა ეკუთვნის სუს-ის თანამშრომელს და მართავს სხვა პირი, ეს კიდევ უფრო დიდი პრობლემაა, განსაკუთრებით, როდესაც ჩემი და ჩემი გუნდის მიმართ მიმდინარეობს ყოველდღიური დევნა. კერძოდ, მათ პერსონალური მონაცემები იძულებით ჩამოართვეს ჩემი შტაბის წევრებს და ჩემს ოფიციალურ წარმომადგენელს საოლქო-საარჩევნო კომისიაში.

მივმართავ სუს-ს: თქვენი თანამშრომლები თუ მათი ოჯახის წევრები ქუჩებში შეიარაღებული გადაადგილდებით, ეს არის პრობლემა და მოვითხოვ ყველა ფაქტზე გამოძიების დაწყებას. ასევე, მოვუწოდებ ყველა სადამკვირვებლო მისიას, დააფიქსირონ წინასაარჩევნო ძალადობრივი გარემო", — აცხადებს ის.

დღეს, 9 ოქტომბერს, გალდავამ განაცხადა, რომ სუს მის წინასაარჩევნო კამპანიას ხელს უშლის. მისი თქმით, მეტრომშენის დასახლებაში მას და თავისი ოფისის წევრებს პლაკატების გაკვრისას ძალოვანი სტრუქტურების წარმომადგენლებმა პერსონალური მონაცემები მოსთხოვეს. მისივე თქმით, გარდა ამისა, ძალოვანებმა ისინი დააშინეს, რომ იმ მონაცემებით მათი იდენტიფიცირება მოხდებოდა და ზეწოლას განახორციელებდნენ.

"გამოიძახეს სამი ეკიპაჟი, რის შემდეგაც პირადად მივედი და დავაფიქსირე არა მხოლოდ პატრულ-ინსპექტორები, არამედ პირები დაბურულ შუშებიანი მანქანებით, რომლებიც შემდეგ ლოკაციაზე გამომყვნენ. ერთ-ერთს ხელკეტიც კი ჰქონდა მანქანაში. ეს არის პირდაპირი ზეწოლა ჩემზე და ჩემს თანამშრომლებზე. ყველა ეს პირი იდენტიფიცირებულია, ისინი იყვნენ გამგეობის სოციალური სამსახურის წარმომადგენლები და მეტრომშენის ზონის კოორდინატორი ქართული ოცნებიდან", — განაცხადა ლანა გალდავამ.