პიქსარის ახალი ანიმაცია, Soul, რომელსაც ყველა მოუთმენლად ელის, კინოთეატრების ნაცვლად ექსკლუზიურად გამოვა დისნეი პლუსზე. წლის მოვლენად შეფასებული ანიმაცია სტრიმინგ სერვისზე შობას, 25 დეკემბერს გამოჩნდება. იმ ქვეყნებში, სადაც პლატფორმა ხელმისაწვდომი არაა, კვლავ განიხილება მისი დიდ ეკრანებზე გაშვება, თუმცა თარიღი ჯერჯერობით უცნობია.

Soul-ის პრემიერა 2020 წლის ივნისში იყო დაგეგმილი, რომელიც კორონავირუსის პანდემიის გამო გადაიდო. მოგვიანებით მის გამოსვლის თარიღად 20 ნოემბერი შეირჩა, თუმცა იგივე მიზეზით გადაიდო ისიც.

ფოტო: Pixar

2020 წელს დაგეგმილ პრემიერებს შორის Soul ის ერთ-ერთი ყველაზე საინტერესო და დამაინტრიგებელი ანიმაციად ითვლება. მის შექმნაზე Disney და Pixar მუშაობდნენ, რაც ანიმაციების მოყვარულებს თავიდანვე აძლევს იმის გარანტს, რომ მომავალი სანახაობისგან იმედგაცრუებას ყველაზე ნაკლებად უნდა ელოდნენ.

ახალი ანიმაციის სიუჟეტური ხაზი მთლიანად ადამიანის იდენტობის ირგვლივაა აგებული. ისტორიის მთავარი გმირი სკოლის მასწავლებელი ჯო გარდნერია, რომლის ოცნებაც ჯაზის ვარსკვლავად ქცევაა, თუმცა მისი ცხოვრება მოულოდნელი შემთხვევის გამო მთლიანად იცვლება.

"შენი ძვირფასი დრო იმისთვის გამოიყენე, რომ საკუთარი თავი — შენი ბრწყინვალე, ცეცხლოვანი შინაგანი სამყარო ბოლომდე გამოხატო და ამ სამყაროს რაღაც ღირებული შესძინო. მოემზადე, შენი ცხოვრება იწყება", — ამბობს ჯო გარდნერი ტრეილერში.

მნიშვნელოვანია ისიც, რომ ეს Pixar-ის პირველი ანიმაცია იქნება, რომლის მთავარი გმირიც შავკანიანია.

Soul-ის რეჟისორი პიტ დოქტერია, რომელსაც მანამდე ისეთი ცნობილი ანიმაციები შეუქმნია, როგორებიცაა Up და Inside Out: ორივე პროექტი სხვადასხვა დროს ოსკარების დაჯილდოებაზე წლის საუკეთესო ანიმაციად დასახელდა.

დისნეისა და პიქსარის ურთიერთთანამშრომლობით ბოლო წლებში შექმნილი ისეთი ანიმაციები, როგორებიცაა Coco და Toy Story 4, ოსკარების ტრიუმფატორი პროექტები აღმოჩნდა, შესაბამისად, თამამად შეგვიძლია ვივარაუდოთ, რომ მომავალი წლის დაჯილდოებაზეც ამერიკის კინოაკადემიის ფავორიტი სწორედ ამ კომპანიების წარმოებული პროექტები გახდება.

ამავე თემაზე: