ცენტრალური საარჩევნო კომისიის განცხადებით, უცხო პირები საუბნო საარჩევნო კომისიის მუშაობის შეფერხებას ცდილობენ. კერძოდ, ისინი თავმჯდომარის სახელით საუბნო საარჩევნო კომისიის წევრებს უკავშირდებიან და ეუბნებიან, რომ მათი მისვლა კონკრეტულ დღეს საჭირო არაა. მათივე თქმით, აღნიშნული პირები კომისიის წევრებს მათთვის შეუსაბამო დავალებებს აძლევენ.

ცესკოს განცხადებით, მსგავსი ზარები, სავარაუდოდ, საუბნო საარჩევნო კომისიის მუშაობის შესაფერხებლადაა გამიზნული. ამასთან, შეუსაბამო დავალებების მიცემით საარჩევნო ადმინისტრაციის რეპუტაციის დაზიანების მცდელობა იკვეთება.

ცესკოს თქმით, გუშინ ერთ-ერთი პარტიის წარმომადგენელმა საუბნო საარჩევნო კომისიის წევრთა ტრენინგზე შეჭრა და მისი ჩაშლა სცადა.

ცესკო ყველა ჩართულ და დაინტერესებულ მხარეს მოუწოდებს, რომ საარჩევნო ადმინისტრაციის ფუნქციებში არ ჩაერიონ და საარჩევნო უბნის საქმიანობის შეფერხება, ან ჩშლა არ სცადონ, რათა საარჩევნო ადმინისტრაციას შესაძლებლობა მიეცეს მოემსახუროს ამომრჩევლებს და კანონმდებლობის შესაბამისად განახორციელოს საარჩევნო ღონისძიებები.