ევროპული საქართველოს ლიდერი, დავით ბაქრაძე, პარტიის მაჟორიტარი დეპუტატობის კანდიდატთან მთაწმინდისა და კრწანისის ოლქში, შალვა შავგულიძესთან ერთად, თბილისის მოსახლეობას შეხვდა. შეხვედრას, ასევე, ესწრებოდნენ პარტიის სხვა ლიდერები — სერგი კაპანაძე და ირაკლი აბესაძე. ევროპული საქართველოს წევრებმა მოსახლეობას გააცნეს პარტიის გარდამტეხი ცვლილებების გეგმა.

დავით ბაქრაძის თქმით, იმ კრიზისს, რომელიც დღეს ქვეყანაშია, სჭირდება მნიშვნელოვანი ცვლილებები, რომელიც ქვეყანას წაიყვანს წინ — არ დატოვებს აწმყოში და არ დააუბრუნებს წარსულში.

"ქვეყანას სჭირდება ცვლილებები, იმიტომ, რომ დღეს ჩვენი საზოგადოების დიდი ნაწილი ფიქრობს, რომ ქვეყანა ვითარდება არასწორად; იმიტომ, რომ არ იქმნება სამუშაო ადგილები და მატულობს უმუშევრობა; იმიტომ, რომ ოჯახებს არ აქვთ შემოსავალი და იზრდება ფასები; იმიტომ, რომ უფრო და უფრო მეტ ადამიანს უჭირს თავის გატანა და ოჯახის შენახვა; იმიტომ, რომ ჩვენს ქუჩებში დაბრუნდა კრიმინალი, რომელიც დამარცხებული იყო. ძალიან ბევრი მიზეზი დაგროვდა, რის გამოც ქვეყანას სჭირდება ცვლილებები და ყველა ეს ცვლილება, გარდამტეხი ცვლილება უნდა მოიტანოს 31 ოქტომბრის არჩევნებმა.

ვინ შეიძლება მოიტანოს ეს ცვლილებები? გუნდმა, რომელსაც აქვს ხედვა და გამოცდილება. გუნდმა, რომელსაც გაუკეთებია საქმე. ჩვენ დღეს ვართ არჩევანის წინაშე, დავტოვოთ აწმყო, რადგან არის ერთი მხარე, რომელიც გვეუბნება, რომ დავტოვოთ აწმყო, ეს ჭაობი, რომელშიც დღეს ვართ და ყველაფერი კარგად არის. ჩვენი არჩევანი არ იქნება აწმყოს და ჭაობის დატოვება, მაგრამ ასევე მკაფიოდ უნდა ვიცოდეთ და ვთქვათ, რომ ჩვენი არჩევანი არ იქნება 2012 წელში დაბრუნება. ჩვენ პასუხისმგებლობას ვიღებთ წარსულზე, კარგზეც და ცუდზეც, მაგრამ, თუ გვინდა უკეთესობა, წინსვლა, ქვეყანა უნდა წავიყვანოთ წინ. ვიღაცას უნდა 2019 წელი, ვიღაცას უნდა 2012 წელი, ჩვენ კი გვინდა 2021 წელი, რომელიც იქნება უკეთესი, ვიდრე ყველა სხვა წელი.

სწორედ ამ 2021 წელმა უნდა მოიტანოს ის გარდამტეხი ცვლილებები, რომელიც ჩვენ გვაქვს გეგმაში: 100 000 სამუშაო ადგილის შექმნა, თითოეული ოჯახისთვის დაზოგილი 2000 ლარი და შემცირებული გადასახადები, გაორმაგებული პენსია, სოციალური და დევნილთა დამხარება, დამარცხებული კრიმინალი და ფეხზე დამდგარი დამოუკიდებელი სასამართლო, მეტი ქონებისა და ძალაუფლების გადაცემა ხალხისათვის. დიახ, ჩვენი მთავარი პრინციპია: ნაკლები ფული, კეთილდღეობა და ძალაუფლება მთავრობას და მეტი ფული, შემოსავალი და კეთილდღეობა ხალხს — აცხადებს ბაქრაძე.