ამერიკელი მომღერალი და უკვე პოეტიც, ლანა დელ რეი, საკუთარი პოეზიის სადებიუტო კრებულის კალიფორნიაში გამართულ პრეზენტაციაზე ერთობ ორიგინალური "პირბადით" გამოჩნდა, რამაც მისი ფანების ნაწილი გააღიზიანა.

პოპვარსკვლავი ლოს-ანჯელესში, წიგნის მაღაზია Barnes & Noble-ის ერთ-ერთ ფილიალს ესტუმრა და საკუთარი წიგნიდან, ია უკუხრილი ბალახის თავზე, ნაწყვეტები წაიკითხა.

დელ რეის ბრჭყვიალა ბადით მოქსოვილი პირბადე ეკეთა, რომლითაც მანამდე Interview magazine-ის გარეკანზე გამოჩნდა.

"ლანა, გთხოვ, ნამდვილი პირბადე ატარე. გეხვეწები, საკუთარ უსაფრთხობაზე იზრუნე", — წერს მომღერლის ერთ-ერთი ფანი ინსტაგრამზე განთავსებული ფოტოს კომენტარებში.

"ლანა მიყვარს, თუმცა ეს წარმოუდგენლად უპასუხისმგებლო საქციელია", — წერს სხვა გულშემატკივარი.

დელ რეის დამ, ქეროლაინ გრენტმა, რომელიც ინსტაგრამზე პირდაპირი ეთერით გადმოსცემდა მომღერლის პოეზიის საღამოს, განაცხადა, რომ კორონავირუსზე ჩატარებული ლანას ტესტის პასუხი უარყოფითია; ამასთან, გრენტის თქმით, მას გულშემატკივრებთან ორმეტრიანი დისტანცია ჰქონდა დაცული.

მიუხედავად ამისა, ტვიტერის ერთ-ერთ ანგარიშზე გამოქვეყნებულ ფოტოებში ჩანს, რომ მომღერალი საღამოს დასასრულს ფანებთან ერთად იღებს ფოტოებს, რაც კალიფორნიაში არსებული ფიზიკური დისტანცირების წესებს ეწინააღმდეგება.

"გთხოვ, მითხარი, რომ ამ ბადის მიღმა რაიმე ნაქსოვი ან პლასტიკური ბარიერია", — წერს კიდევ ერთი ფანი კომენტარებში.

ეს მართლაც შესაძლებელია. ზოგიერთი მაღაზია მომხმარებელს ისეთ პირბადეს სთავაზობს, რომლითაც პირის დანახვაა შესაძლებელი.

მომღერალი კრიტიკას არ გამოხმაურებია, თუმცა ამ ამბის შემდეგ მან ინსტაგრამზე ვიდეო გამოაქვეყნა, სადაც ერთ-ერთ ლექსს კამუფლაჟის სტილში გადაწყვეტილი პირბადით კითხულობს. ვიდეოს დასასრულს დელ რეი პირბადეს იხსნის. ამ ჟესტით კი გულშემატკივრებისგან დადებითი კომენტარები დაიმსახურა:

"როგორც იქნა, ნამდვილი პირბადე", — შვებით აცხადებს ერთ-ერთი ფანი პოსტის კომენტარებში.

დაავადებათა კონტროლის ცენტრის ხელმძღვანელის, ამირან გამყრელიძის, თქმით, პირბადე კვლავ რჩება უმთავრეს იარაღად კორონავირუსთან ბრძოლაში. აშშ-ის დაავადებათა კონტროლისა და პრევენციის ცენტრის დირექტორი კი აღნიშნავს, რომ პირბადის ტარება, შესაძლოა, პრევენციულ ვაქცინაზე ეფექტურიც კი იყოს.