ევროპული საქართველოს ერთ-ერთი ლიდერი, ფოთის, ხობისა და სენაკის მაჟორიტარობის კანდიდატი, გიგა ბოეკრია, უშიშროების საბჭოს მოწვევას და ყარაბაღის კონფლიქტზე საქართველოს მთავრობის პოზიციას აფასებს.

ბოკერიას თქმით, უშიშროების საბჭოს მოწვევა დაგვიანებული იყო და რეალურად ის მხოლოდ ფორმალურ ხასიათს ასრულებს. მან ასევე აღნიშნა, რომ საქართველოს ხელისუფლება ვერ შეასრულებს ვერანაირ როლს კონფლიქტის მოგვარებაში, რადგან მას დაკარგული აქვს რეპუტაცია როგორც რეგიონში, ისე მთლიანად მსოფლიოში.

"პრობლემა მდგომარეობას იმაში, რომ დღევანდელ ხელისუფლებას, ივანიშვილს, მის გარემოცვას, მის პრემიერმინისტრს თუ პრეზიდენტს, არც რეგიონში და არც მსოფლიოში არ და აღარ აქვთ ის ავტორიტეტი, რომ მათ სიტყვას ჰქონდეს ფასი ასეთი დაძაბულობის დროს. ეს არის საქართველოს პრობლემა, რაც არ უნდა თქვან.

უშიშროების საბჭოს მოწვევა დაგვიანებული იყო და ყველამ იცის, რომ ეს ორგანო, რეალურად აღარ არსებობს. ამიტომ, დატვირთვა აღარ აქვს იმას, რასაც იტყვიან, თორემ ისე, ეს განცხადება დაგვიანებულია და რა თქმა უნდა, საქართველო ასეთ ვითარებაში არ უნდა გამოჩნდეს მხარედ ამ კონფლიქტში ჩვენ მეზობლებს შორის. მიუხედავად იმისა, რომ ჩვენი პოზიცია მყარია აზერბაიჯანის ტერიტორიული მთლიანობის მხარდაჭერის თვალსაზრისით.

ეს ხელისუფლება ვერანაირ როლს ვერ შეასრულებს, რადგან იმისათვის, რომ რაიმე როლი შეასრულო, უნდა გქონდეს რეპუტაცია, ხოლო ივანიშვილს და მის გარემოცვას მსოფლიოში და რეგიონში რეპუტაცია აქვთ დაკარგული", — განაცხადა გიგა ბოკერიამ.