ახალ ბიოგრაფიულ ფილმში რაიან გოსლინგი ამერიკელი ასტრონავტის ნილ არმსტრონგის როლს შეასრულებს. გადაღებები მომავალ წელს დაიწყება.

ფილმის რეჟისორი, ისევე როგორც გოსლინგის წინა ფილმის La La Land-ის შემთხვევაში, ახლაც დემიენ შაზელი იქნება.

ნილ არმსტრონგი ამერიკელი ასტრონავტი და სამხედრო-საზღვაო ფლოტის ოფიცერი იყო. 1972-1979 წლებში კი ცინცინატის უნივერსიტეტში აეროკოსმოსური კვლევების პროფესორად მუშაობდა.

არმსტრონგი 1969 წელს კოსმოსურ მისია აპოლონ 11-ს ხელმძღვანელობდა. აპოლონ 11-მა კენედის კოსმოსური ცენტრი 16 ივლისს დატოვა და 4 დღეში მთვარის ზედაპირზე დაეშვა, ეს იყო მოვლენა რომელსაც მთელი მსოფლიო პირდაპირ ეთერში ადევნებდა თვალს.

1969 წლის 20 ივლისს, პირველად კაცობრიობის ისტორიაში, ადამიანმა დედამიწის გარდა სხვა კოსმოსურ სხეულზე დადგა ფეხი.

აპოლონ 11-ის ეკიპაჟი, ნილ არმსტრონგის, ბაზ ოლდრინისა და მაიკლ კოლინსის შემადგენლობით, მთვარეზე დაჯდა. ნილ არმსტრონგი კი პირველი ადამიანი გახდა, რომელმაც მთვარეზე დადგა ფეხი და სწორედ მაშინ თქვა ცნობილი ფრაზა:

"ეს პატარა ნაბიჯი ადამიანისთვის, არის დიდი ნახტომი კაცობრიობისთვის"

შეგახსენებთ, რომ რაიან გოსლინგი წელს ოსკარის ერთ-ერთი ფავორიტია ლა ლა ლენდში შესრულებული როლისთვის, ისევე როგორც მისი პარტნიორი ემა სტოუნი და ფილმის რეჟისორი, დემიენ შაზელი. საერთო ჯამში კინოსურათს ოსკარის 14 ნომინაცია აქვს.