სერიალ ხელოვნური სუნთქვის გადაღებები აღარ გაგრძელდება. პროექტი შეჩერებულია. ამასთან დაკავშირებით გუშინ განცხადება გაავრცელა სერიალის ოფიციალურმა გვერდმაც:

"ამ ეტაპზე უცნობია, იქნება თუ არა ხელოვნური სუნთქვის მესამე სეზონი".

გადაღებების შეჩერების მიზეზებზე სასაუბროდ სერიალის პროდუსერ ირაკლი საღინაძეს დავუკავშირდით, რომელმაც დაადასტურა, რომ სერიალის მესამე სეზონი ამ ზამთარს რუსთავი 2-ის ეკრანებზე აღარ დაბრუნდება:

"ამჟამად სერიალი შეჩერდა, მაგრამ არსებობს საფრთხე, რომ ის საბოლოოდ დაიხურება. მესამე სეზონი რომ აღარ დაბრუნდება ზამთარში, ეს შემიძლია 100 პროცენტით დავადასტურო. არხზე შექმნილი ფინანსური მდგომარეობა და მის გარშემო არსებული ვითარება არ გვაძლევს საშუალებას, რომ ზუსტი გეგმა შევიმუშავოთ, როგორც მინიმუმ, ახალი სეზონის მოსამზადებლად.

"მაყურებლის ძალიან კარგად მესმის, თან ისეთი ინტრიგით დასრულდა, რომ აუცილებელია სერიალს გაგრძელება ჰქონდეს"

ირაკლი საღინაძე

თებერვალში გვსურდა ეთერის განახლება, რაც შეუძლებელი აღმოჩნდა, რადგან იანვარში გადაღებებს ვერ დავიწყებთ. ამისთვის არანაირი ოპტიმისტური საფუძველი არ არსებობს".

ირაკლი საღინაძის თქმით, სერიალის შეჩერება უკავშირდება რუსთავი 2-ის ყადაღასა და შექმნილ ფინანსურ მდგომარეობას, ქვეყნის ეკონომიკურ კრიზისს:

"არხისთვის და მითუმეტეს ჩვენთვის [ფორმულა კრეატივი] კომერციულად და ეკონომიკურად წამგებიანი პროექტის წარმოება ფიზიკურად შეუძლებელია. ელემენტარულად ხელფასს ვერ დავარიგებთ თანამშრომლებისთვის.

ფოტო: კადრი სერიალიდან

მაყურებლის ძალიან კარგად მესმის, თან ისეთი ინტრიგით დასრულდა, რომ აუცილებელია, სიუჟეტს გაგრძელება ჰქონდეს. სამწუხაროდ, ბოლო დღეებამდე ეს გაურკვევლობა არსებობდა. მინიმუმ მარტი-აპრილამდე სერიალის ეკრანებზე დაბრუნება შეუძლებელი იქნება".

სერიალის პროდიუსერის თქმით, ამ ეტაპზე სერიალის განახლების კონკრეტულ თარიღზე მსჯელობა გამორიცხულია:

"სამწუხაროდ, ამჟამად სერიალს არ აქვს იმდენი შემოსავალი, რომ თუნდაც საკუთარი თავი შეინახოს. ბაზარი განაპირობებს იმას, რომ სერიალი შეჩერებულია. ამ პერსპექტივით, მზადების დაწყება იანვარ-თებერვალში შეუძლებელია. უნდა დაველოდოთ, რა ვითარება იქნება მომავალ 2-3 თვეში. სერიალს ძალიან სჭირდება გარე დაფინანსება თუნდაც სპონსორების მხრიდან. სხვანაირად, გადაღებებს ვერ განვაახლებთ".

ირაკლი საღინაძის განცხადებით, მსგავსი საფრთხე ჩემი ცოლის დაქალებს არ ემუქრება:

"ჩემი ცოლის დაქალები თვითკმარი პროექტია როგორც ჩვენთვის, ისე არხისთვის. შოულობს საკმარის თანხას იმისთვის, რომ თავად კვებოს საკუთარი თავი"

სერიალი ხელოვნური სუნთქვა პირველად ეთერში 2016 წლის 8 ივნისს გავიდა და მალევე გახდა პოპულარული. მაყურებელი ორი სეზონის განმავლობაში აქტიურად ადევნებდა თვალს მთავარი გმირების, შოთასა და თამუნას ცხოვრებას.