დღეს 22:00 საათზე რუსთავი 2-ის ეთერში სერიალ ხელოვნური სუნთქვის მეორე სეზონის ბოლო სერია გავიდა. თუმცა როგორც შოუს ოფიციალური ფეისბუქ გვერდი გვაცნობებს, შესაძლოა ის მესამე სეზონით ეთერში აღარ დაბრუნდეს.

"რაც შეეხება სერიალის გაგრძელებას - ამ ეტაპზე უცნობია, იქნება თუ არა ხელოვნური სუნთქვის მესამე სეზონი." - წერია განცხადებაში.

სერიალის პირველი სეზონი ეთერში 8 ივნისს დაიწყო და მის გამოსვლამდე იქმნებოდა შთაბეჭდილება, რომ ახალი შოუ სამედიცინო დრამა იყო. თუმცა, საბოლოოდ აღმოჩნდა, რომ ეს არ არის კლასიკური სამედიცინო დრამა. მთავარი გმირი შოთა (თორნიკე გოგრიჭიანი) სასწრაფოს ექიმია, რომლის ცხოვრება მთლიანად შეცვალა წარსულში მომხდარმა ტრაგიკულმა ამბავმა. მიუხედავად სამედიცინო სიუჟეტური ხაზების არსებობისა, ხელოვნური სუნთქვა მეტი იყო, ვიდრე კლასიკური სამედიცინო დრამა.

მეორე სეზონის პრემიერა 14 სექტემბერს შედგა და ის ყოველ ოთხშაბათსა და ხუთშაბათს გადიოდა რუსთავი 2-ის ეთერში.