აშშ-ში გულისამაჩუყებელი ამბავი მოხდა — 89 წლის პიცის მიმტანს TikTok-ერებმა $12000 შეუგროვეს და აჩუქეს.

დერლინ ნიუეიმ აშშ-ში, იუტას შტატში, კვირაში 30-საათი იმუშავა პიცის მიმტანად და რამდენიმე ერთგული მომხმარებელიც გაიჩინა — მათგან ერთ-ერთ ოჯახს TikTok-ზე საკმაოდ ბევრი გამომწერი ჰყავდა. ვალდესების ოჯახს ძალიან მოეწონა ნიუეის უშუალობა და საფირმო ფრაზა — "სალამი, პიცას ხომ არ ეძებთ?" — თანაც იმდენად, რომ შეკვეთისას კურიერად კონკრეტულად დერლინს ითხოვდნენ.

ოჯახმა ნიუეისთან ინტერაქციები თავის პლატფორმაზე ატვირთა და მართალია, თვითონ მოხუცს არ ესმის, რა არის TikTok — ერთ-ერთ ჩანაწერში ის კითხვასაც კი სვამს: "ანუ მთელი შენი ხალხი მიცნობს ინტერნეტში? პიცის მოტანის გამო?" — ის მალევე გახდა ტიკტოკის ვარსკვლავი.

როდესაც ვალდესების ოჯახის გამომწერებმა იკითხეს, თუ რატომ უწევდა მისი ასაკის ადამიანს პიცების მიმტანად მუშაობა, პასუხი საკმაოდ დამამწუხრებელი აღმოჩნდა: დერლინის სოციალური უზრუნველყოფის თანხა საკმარისი არ იყო მისი ხარჯების დასაფარად.

ვალდესების ოჯახმა გამომწერებს ნიუეის დასახმარებლად შემოწირულობების გაღება სთხოვეს და კეთილმა ადამიანებმაც არ დააყოვნეს. მთლიანობაში ნიუეის $12 069 შეუგროვეს და სახლში მიუტანეს.

მოხუცი საჩუქარს აცრემლებული შეხვდა: "როგორ უნდა მოვახერხო ოდესმე ამისთვის მადლობის გადახდა? არც კი ვიცი, რა ვთქვა".

ეს ამბავი ადგილობრივმა საინფორმაციო სააგენტოებმა გააშუქეს სოლთ-ლეიკ-სიტიში, საბოლოოდ კი მან ისეთ პლატფორმებამდე მიაღწია, როგორიც CNN-ია. ხალხმა ამ შემთხვევას იმის მტკიცებულება უწოდა, რომ აშშ-ში ადამიანურობა ჯერ კიდევ არსებობს — დიდებული ამბავი იმისა, თუ რაოდენ შესანიშნავი ადამიანია ზოგი ამერიკელი და როგორ არის ხალხი მზად, გაიღოს ცოტა, რათა მნიშვნელოვნად დაეხმაროს ვინმეს.