აზერბაიჯანი-სომხეთის საზღვარზე შეტაკებები მთელი ღამის განმავლობაში გაგრძელდა. ორივე მხარე შეტაკებებისა და ერთმანეთის ტექნიკის განადგურების ვიდეო- და ფოტომასალას აქვეყნებს.

აზერბაიჯანის თავდაცვის სამინისტროს განცხადებით, 29 სექტემბრის ღამეს სომხეთი კონტრშეტევებით დაკარგული ტერიტორიების დაბრუნებას ცდილობდა, თუმცა მათ ეს მცდელობები აღკვეთეს. ამასთან, აზერბაიჯანული მხარე აცხადებს, ქალაქ ფიზულის მიმართულებით შეტევას აგრძელებენ.

ბაქოში ამბობენ, რომ სომეხმა სამხედროებმა ვარდენისის რაიონიდან აზერბაიჯანის დაშქესანის რაიონის მიმართულებით საარტილერიო თავდასხმა განახორციელეს. აღნიშნული ინფორმაცია ერევანმა უარყო. მათივე თქმით, თავდასხმისას კიდევ ოთხი სომხური ტანკი გაანადგურეს.

თავის მხრივ ერევანში აცხადებენ, რომ მათ აზერბაიჯანის საბრძოლო ვერტმფრენი ჩამოაგდეს.

აზერბაიჯანი ასევე ამტკიცებს, რომ სომხეთის პოლკი მარტუნი სრულად გაანადგურეს. სომხეთმა აღნიშნული ინფორმაციაც უარყო.

ღამის პირველი საათისთვის თვითაღიარებული რესპუბლიკა არცახის (ყარაბაღი) თავდაცვის სამინისტრომ დაღუპულების შესახებ ინფორმაცია გამოაქვეყნა. როგორც ისინი აცხადებენ, ორშაბათს მათ კიდევ 26 სამხედრო დაკარგეს — სულ 84.

ერევანში აცხადებენ, რომ ყარაბაღში, ქალაქ გადრუტში უპილოტო საფრენმა აპარატმა ორი სახლი ააფეთქა, რის შედეგადაც ერთი ადამიანი დაიღუპა, სამი კი დაშავდა.

გაეროს გენერალურმა მდივანმა, ანტონი გუტიერეშმა აზერბაიჯანის პრეზიდენტ ილჰამ ალიევს დაურეკა და სიტუაციის დეესკალაციისკენ და ცეცხლის შეწყვეტისკენ მოუწოდა. მსგავსი შინაარსის საუბარი გუტიერეშს სომხეთის პრემიერმინისტრთან, ნიკოლ პაშინიანთანაც ჰქონდა.

ამასთან, გერმანიისა და საფრანგეთის ინიციატივით გაეროში უშიშროების საბჭოს სხდომა გაიმართება, სადაც მთიან ყარაბაღში მიმდინარე კონფლიქტს განიხილავენ.

სატელეფონო საუბარი შედგა სომხეთის პრემიერსა და გერმანიის კანცლერს შორის. როგორც სომხეთის მთავრობის განცხადებაშია აღნიშნული, ნიკოლ პაშინიანმა ანგელა მერკელს მოუწოდა, გამოიყენოს ყველა შესაძლებლობა, რათა თურქეთის ქმედებები შეზღუდონ.

27 სექტემბერს მთიან ყარაბაღში სამხედრო დაპირისპირება განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.