პოლიციელების კანონიერი მოთხოვნისადმი დაუმორჩილებლობის ბრალდებით თბილისში ორი პირი დააკავეს.

შსს-ს პრესამსახურის მტკიცებით, ბრალდებულები 21 თებერვალს ისანი-სამგორის სამმართველოს ფონიჭალის პოლიციის განყოფილებაში შეიჭრნენ და პოლიციელებს სიტყვიერი შეურაცხყოფა მიაყენეს. მიუხედავად სამართალდამცველების მხრიდან არაერთგზის კანონიერი მოთხოვნისა, დაეტოვებინათ შენობა და შეეწყვიტათ თავიანთი უკანონო ქმედება, ისინი პოლიციელების კანონიერ მოთხოვნას არ დაემორჩილნენ და პოლიციის თანამშრომლებს საქმიანობაში ხელს უშლიდნენ.

გამოძიება ადმინისტრაციულ სამართალდარღვევათა კოდექსის 173-ე მუხლით მიმდინარეობს, რაც სამსახურებრივი მოვალეობის შესრულების დროს სამართალდამცავი ორგანოს თანამშრომლის კანონიერი განკარგულებისადმი ან მოთხოვნისადმი დაუმორჩილებლობასა და პოლიციელთა სიტყვიერ შეურაცხყოფას გულისხმობს.

დაკავებულები იმ არასრულწოვნის ახლობლები არიან, რომელიც რამდენიმე დღის განმავლობაში გატაცებული ჰყავდათ. ოჯახის წევრები სამართალდამცავებისგან 17 წლის გოგოს მოძებნას და სახლში დაბრუნებას მოითხოვდნენ, რა დროსაც მათი ნაწილი პოლიციის შენობაში შეიჭრა.