მარტვილის საკათედრო ტაძარში საეკლესიო მსახურების დროს რამდენიმე სასულიერო პირმა და მეუფე ნიკოლოზმა მთავარი არხის ჟურნალისტს ტაძრის დატოვება მოსთხოვეს. ისინი ამტკიებდნენ, რომ ჟურნალისტი ღვთისმსახურებას ხელს უშლიდა. სანამ სასულიერო პირები ამას იმეორებდნენ, მრევლის ერთ-ერთი წევრი გადამღებ ჯგუფს აპარატურის დამტვრევით დაემუქრა.

როგორც მთავარი არხის გავრცელებულ კადრებში ჩანს, კამათი დაიწყო იმით, რომ ერთ-ერთი სასულიერო პირი ჟურნალისტს რამდენჯერმე ხელით შეეეხო და უთხრა: "გადი აქედან". მათ საუბარში ჩაერთო მეუფე ნიკოლოზი, რომელმაც განაცხადა, რომ ჟურნალისტი ხელს უშლიდა ღვთისმსახურებას და გარეთ უნდა გასულიყო, უარის შემდეგ კი თქვა, რომ მომხდარს თავადაც გადაიღებდა.

ფოტო: კადრები ვიდეოდან / მთავარი არხი

ვიდეოში ჩანს, რომ მეუფის ჩარევის შემდეგ, ჟურნალისტებს მუქარით მიმართა მრევლის ერთ-ერთმა წევრმა, სასულიერო პირებს კი ამაზე რეაგირება არ ჰქონდათ და ამ დროს შენიშვნა ისევ ჟურნალისტს მისცეს და მოუწოდეს ტაძარი დაეტოვებინა. როგორც მეუფის, ასევე, მრევლის მხრიდან, გაჟღერდა ხმამაღალი მოწოდებები ტაძრის დატოვების შესახებ.

ტელეკომპანიას გავრცელებული აქვს ტაძრის გარეთ გადაღებული ვიდეოც, სადაც ჩანს, რომ ჟურნალისტები ცდილობენ კითხვები დაუსვან მეუფეებს საარჩევნო პროცესში ჩართულობასთან დაკავშირებით, ამ დროს კი სასულიერო პირები მათ გზას უღობავდნენ და ხელს კრავდნენ ან სხვა პირებთან ერთად, ხელით ცდილობდნენ მათ დაკავებას.

ფოტო: კადრები ვიდეოდან / მთავარი არხი

მოგვიანებით მეუფემ ჟურნალისტების კითხვებს უპასუხა, რის შემდეგაც მთავარი არხის ჟურნალისტი მასთან მარტო მივიდა და კითხვების დასმა ისევ სცადა, რა დროსაც ნიკოლოზმა განაცხადა, რომ მისი ოპერატორი უკვე გაგზავნა და საუბარი აღარ უნდოდა, შემდეგ კი დაამატა: "ახლა გამოვიძახებ ჩემს მძღოლს, შეიძლება გთხოვოთ, ჩემი მძღოლი მოვიდეს? იმიტომ, რომ თავდასხმას აქვს ადგილი. ახლა პოლიციას გამოვიძახებ, ოღონდ მართლა, რა".

ამ დროს მეუფემ კამერა შემოატრიალა და გადაღება სცადა, თუმცა არ გამოუვიდა. ჟურნალისტმა მას დახმარება შესთავაზა, ნიკოლოზმა უარი უთხრა და გადაღება დაიწყო. ვიდეოში ის ამტკიცებდა, რომ ადგილი აქვს თავდასხმას და ჟურნალისტი მას "ჩაუსაფრდა". თან გადაღებისას მეუფე ჟურნალისტს სთხოვდა, კადრში გამოჩენილიყო, რის შემდეგაც განაცხადა: "ეს არის ნამდვილი ძალადობა ადამიანზე".

ფოტო: კადრები ვიდეოდან / მთავარი არხი

ეს პირველი შემთხვევა არ არის, როდესაც სასულიერო პირები, ისევე, როგორც მრევლი აგრესიულად არის განწყობილი ჟურნალისტების მიმართ. ნახეთ ვიდეო, რომელსაც ტელეკომპანია ავრცელებს: