ნაციონალური მოძრაობის დეპუტატის, თინა ბოკუჩავას განცხადებით, რეგიონებში მათი შტაბის წევრებს გამოგონილი იდენტობის მქონე პირი უკავშირდებოდა პარტიის სახელით და არჩევნების საბოტაჟისკენ, რევოლუციური სცენარისკენ მოუწოდებდა. ბოკუჩავას ვარაუდით, ეს პირი სუს-ის მიგზავნილია ბიძინა ივანიშვილის დავალებით, ამიტომ მოუწოდებს უწყებებს, რომ ჰქონდეთ რეაგირება.

ბოკუჩავას თქმით, პირი, რომელიც შტაბის წევრებს დაუკავშირდა, მათ გიორგი ნოზაძედ გაეცნო, თუმცა მათ გადაამოწმეს ტელეფონის ნომერი და ის რეგისტრირებულია სხვა პირზე, რომელიც ცესკოს ამომრჩეველთა ბაზაში არ იძებნება.

ბოკუჩავას თქმით, მთავარ პროკურატურაში სარჩელს შეიტანენ, რომ გაირკვეს, რეალურად ვინ იყენებს აღნიშნულ ნომერს და ვისი დავალებით ხორციელდებოდა დეზინფორმაციული დავალებები.