ხვალ, 21 სექტემბრიდან საქართველოდან ლიეტუვაში ჩასული ნებისმიერი პირი 14 დღიან სავალდებულო თვითიზოლაციის პერიოდს გაივლის. იფნორმაცია ამის შესახებ საქართველოს საელჩომ ლიეტუვაში საკუთარ ფეისბუქგვერდზე გამოაქვეყნა.

გარდა ამისა, ქვეყანაში შესული პირი ვალდებულია, საზღვარზე წარადგინოს უკანასკნელი 72 საათის განმავლობაში კორონავირუსზე ჩატარებული ტესტის უარყოფითი პასუხი.

გამოქვეყნებულ ინფორმაციაში, ასევე, ვკითხულობთ, რომ ყველა მგზავრი ვალდებულია შეავსოს ლიეტუვის ეროვნული ჯანმრთელობის ცენტრის ვებ-გვერდზე განთავსებული სპეციალური ელექტრონული ანკეტა. მიღებული დასტური ე.წ. QR სატრანსპორტო საშუალებაში ჩაჯდომის წინ წარადგინოს.

განცხადებაში ნათქვამია, რომ ეპიდემიოლოგიური სიტუაციიდან გამომდინარე, ლიეტუვის მთავრობა პერიოდულად აახლებს იმ ქვეყნების სიას, სადაც ვირუსის გავრცელების მაღალი რისკია (თუ უკანასკნელი 14 დღის განმავლობაში ვირუსის გავრცელების ნიშნული აღემატება 25 შემთხვევას 100 000 მოსახლეზე) და შესაბამისად, ამ ქვეყნებიდან მოგზაურობის შემთხვევაში სავალდებულოა ზემოთ აღნიშნული წესების დაცვა.

თუ პირს იზოლაციის არაუადრეს მე-8 დღეს კორონავირუსზე ტესტი ჩაუტარდება, შესაძლოა, თვითიზოლაციის პერიოდი 10 დღემდე შეუმცირდეს.

რაც შეეხება ლატვიას, საქართველოდან ჩასულ პირს 10 დღიანი თვითიზოლაციის პერიოდის გავლა უწევს. აღნიშნული დადგენილება უკვე 19 სექტემბრიდან ამოქმედდა და ინფორმაცია საქართველოს საელჩომ ლატვიაში ფესიბუქგვერდზე გამოაქვეყნა.