ბათუმის რესპუბლიკური საავადმყოფოს ექიმის, გიორგი კიკაბიძის თქმით, ამჟამად კლინიკას 1 უკიდურესად მძიმე და 5 მძიმე პაციენტი ჰყავს, ხოლო რეანიმაციაში სულ 17 პაციენტი იმყოფება.

"უკიდურესად მძიმე პაციენტის მდგომარეობა სხვა დაავადებითაა განპირობებული — აქვს ინსულტი, ჰემორაგიული სისხლჩაქცევა თავის ტვინში. ამის გამო იყო აპარატზე უგონო მდგომარეობაში ბათუმის რეფერალურ საავადმყოფოში. აპარატზე მყოფი გაიტესტა, დაუდგინდა კორონავირუსი და წუხელ ჩვენთან გადმოიყვანეს", — განაცხადა გიორგი კიკაბიძემ.

მისი თქმით, სხვა 5 პაციენტის მძიმე მდგომარეობა კორონავირუსითაა გამოწვეული. ორივე ფილტვის დაზიანების გამო სუნთქვის უკმარისობა აქვთ და ამიტომ უწყვეტ რეჟიმში ჟანგბადი მიეწოდებათ.

ამჟამად ბათუმის რესპუბლიკურ საავადმყოფოში სულ 156 პაციენტია. გიორგი კიკაბიძის თქმით, მათგან 4 პაციენტი განყოფილებიდან ეწერება, ხოლო 8 კარანტინში გადადის.