პრორუსული პარტიის, პატრიოტთა ალიანსის შემდეგ ბაგრატის ტაძრის ეზოში პარტიული შეხვედრა ქართულმა ოცნებამაც გამართა. მმართველი გუნდის მაჟორიტარობის კანდიდატის წარდგენას ესწრებოდა ქუთათელ-გაენათელი მიტროპოლიტი იოანეც, რომელსაც პარტიის გენერალური მდივანი, კახა კალაძე სიტყვის დასაწყისშივე მიესალმა.

ფაქტის ამსახველი ფოტო და ვიდეო მასალა მმართველმა გუნდმა გაავრცელა. ფოტოებში ჩანს, რომ პარტიული შეხვედრის დასრულების შემდეგ მიტროპოლიტი პრემიერმინისტრ გახარიას ესაუბრებოდა. იქვე იყვნენ სხვა სასულიერო პირებიც.

ფოტო: ქართული ოცნება

მიტროპოლიტი იოანე ცნობილია პრორუსული შეხედულებებითა და გამონათქვამებით. ბოლო პერიოდში ის განსაკუთრებით აქტიურობდა მაშინ, როცა კორონავირუსის პანდემიის გამო მრევლს ზიარებისა და ტაძარში მისვლისგან თავშეკავება ურჩიეს.

პირველ სექტემბერს პარტიული შეკრება ბაგრატის ტაძრის ეზოში პატრიოტთა ალიანსმა გამართა, რასაც კრიტიკა მოჰყვა. მაშინ საპატრიარქო და ქუთაისის მერიაც ამტკიცებდა, რომ ადგილი, სადაც პატრიოტთა ალიანსმა ყრილობა ჩაატარა, მათ საკუთრებაში არაა.