საქართველოში ამერიკის შეერთებული შტატების ელჩის, კელი დეგნანის განცხადებით, წლევანდელი წვრთნებმა აჩვენა, რომ საქართველოს სამხედრო ძალა შთამბეჭდავად პროგრესირებს. დეგნანმა ღირსეული პარტნიორი 2020-ს დახურვის ცერემონიაზე, ასევე, თქვა, რომ წვრთნების წარმატებულად დახურვა მესიჯს უგზავნის ყველას, რომ ძალა ერთობაშია.

"სიხარულით ვივსები, რომ ვხედავ ქართველი, პოლონელი, ფრანგი, ინგლისელი და ამერიკელი ჯარისკაცები ორკვირიანი ინტენსიური წვრთნის დახურვაზე ერთად დგანან. თქვენ ხართ სიმბოლო ჩვენი ქვეყნების პარტნიორობის. თქვენ გადალახეთ ენობრივი და კულტურული ბარიერი და იმუშავეთ, როგორც ერთმა გუნდმა თქვენ წვრთნების დროს იბრძოდით და მანევრირებდით როგორც ერთი ელემენტი. მხოლოდ შემიძლია ვთქვა, რომ ეს არის შეუდარებელი. თქვენ ხართ სიმბოლო ჩვენი ქვეყნების პარტნიორობის", — განაცხადა ამერიკის ელჩმა საქართველოში.

მისივე თქმით, ორი აზრი არ არსებობს იმაზე, რომ საქართველო ამერიკისა და ნატოს ღირსეული სტრატეგიული პარტნიორია.

საქართველოში მრავალეროვნული წვრთნები, ღირსეული პარტნიორი 2020 სექტემბერში დაიწყო. პროგრამის მასპინძელი საქართველო მეხუთედ გახდა.

წლევანდელი წვრთნების მთავარი მიზანი საქართველოს, აშშ-ს და ნატო-ს წევრ და პარტნიორ ქვეყნებს შორის მზადყოფნისა და თავსებადობის ამაღლება და შავი ზღვის რეგიონში სტაბილურობისა და უსაფრთხოების განმტკიცება იყო.

მრავალეროვნულ წვრთნაში საქართველოს, აშშ-ს, გაერთიანებული სამეფოს, პოლონეთისა და საფრანგეთის 2 700-ზე მეტი სამხედრო მოსამსახურე მონაწილეობდა. საქართველოს თავდაცვის ძალების შეიარაღებაში არსებული ჯავშანტექნიკის, საბრძოლო მანქანებისა და საარტილერიო სისტემების გარდა, სწავლებაში ჩართული იყო ამერიკის შეერთებული შტატების საფრენი საშუალებები და ჯავშანტექნიკა.