ჩეხეთის განვითარების სააგენტო ბათუმისა და რუხის რესპუბლიკურ საავადმყოფოებს 371 ათასი ევროს ღირებულების სამედიცინო აპარატურას გადასცემს. Tied Financial Donation-ის ინიციატივის ფარგლებში გაწეული დახმარება ორივე საავადმყოფოს თანამედროვე ტექნოლოგიებით უზრუნველყოფას ისახავს მიზნად.

ახალი აღჭურვილობა კლინიკებს 2020 წლის ბოლომდე ორ ეტაპად მიეწოდებათ. საერთო 371 ათასი ევროდან ბათუმის რესპუბლიკური საავადმყოფო 186 000 ევროს, ხოლო რუხის რესპუბლიკურ საავადმყოფო 185 000 ევროს მიიღებს.

როგორც ჩეხეთის საელჩოს განცხადებაშია ნათქვამი, ორივე კლინიკა ახლადაშენებულია და ნაწილობრივად დაიწყეს ფუნქციონირება ქვეყანაში COVID-19-ის პანდემიის გავრცელების შემდეგ, თუმცა, ყველა განყოფილებას არ აქვს საჭირო აღჭურვილობა.

ახალი თანამშრომლობა ასევე მოიცავს ტრენინგებს საავადმყოფოების პერსონალისთვის, რომელსაც ჩეხი პროფესიონალები უზრუნველყოფენ. ისინი საკუთარ გამოცდილებას გაუზიარებენ პერსონალს და ახალი ტექნოლოგიების გამოყენებას გაამარტივებენ.