ჯანდაცვის მინისტრის, ეკატერინე ტიკარაძის განცხადებით, აჭარაში კორონავირუსით ინფიცირებული 67 პაციენტი ჰოსპიტლებში გადაყვანას ელოდება. მან ამის შესახებ ტელეკომპანია იმედის ეთერში ისაუბრა.

"ბოლო 3 საათის განმავლობაში 50-ზე მეტი პაციენტი იქნა გადაყვანილი ჰოსპიტლებში. მათ გაიარეს ყველა საჭირო კვლევა და გადანაწილდნენ მათი სიმძიმისა და საჭიროების შესაბამისად. შემდეგი 3-4 საათის განმავლობაში დაკმაყოფილებული იქნება მომლოდინე პაციენტების საჭიროება და ხვალ დილისთვის გვექნება სტაბილური მაჩვენებელი, თუ რამდენი ინფიცირებული და რა ჯანმრთელობის სტატუსით გვყავს აჭარაში", — განაცხადა ტიკარაძემ.

მისივე თქმით, გამომდინარე იქიდან, აჭარაში გაფართოებული კვლევები ტარდებოდა, ტესტების რაოდენობამაც რეკორდულ მაჩვენებლს მიაღწია და ამან გარკვეული ლაბორატორიული სირთულე შექმნა.

"იმისათვის, რომ არ ყოფილიყო დაუზუსტებელი ინფორმაციები, ყოველი მონაცემი საჭიროებდა გადამოწმებას, სისტემაში ატვირთვას და გადაცემას საგანგებო სამსახურებისთვის, რის შემდეგაც მოხდებოდა პაციენტების ჰოსპიტალიზაცია. შეიქმნა მცირედი შეფერხება და დღეის მდგომარეობით იგი უკვე აღმოფხვრილია", — განმარტა მან.

16 სექტემბრის მონაცემებით, საქართველოში კორონავირუსის დადასტურებული 196 შემთხვევიდან 144 აჭარაში გამოვლინდა. ქვეყანაში კორონავირუსის სულ 2 758 შემთხვევაა დადასტურებული. აქედან უკვე 1 412 გამოჯანმრთელდა, ხოლო 19 გარდაიცვალა.