ევროპული საქართველოს საარჩევნო შტაბის ხელმძღვანელის, სერგი კაპანაძის თქმით, ევროპარლამენტარების განცხადებებში ნათლად ჩანს მზაობა და ინტერესი იმაზე, რომ ოქტომბრის არჩევნები ჩატარდეს დემოკრატიულად და ყველანაირი დარღვევის გარეშე.

კაპანაძემ აღნიშნა, რომ თუკი ბიძინა ივანიშვილი შეეცდება იგივე მეთოდების გამოყენებას არჩევნებზე, რასაც ის წინა არჩევნებზე იყენებდა, ამას ექნება მკაფიო პასუხი როგორც ქართული საზოგადოების, ისე უცხოელი პარტნიორების მხრიდან.

"ინტერესი საქართველოში ჩასატარებელ არჩევნებთან დაკავშირებით ევროპარლამენტის მხრიდან ძალიან დიდია და ეს დებატებიც და დოკუმენტიც ამაზე მეტყველებს, ისევე როგორც განცხადებები, რომლებიც ევროპარლამენტარებმა გააკეთეს. მათი ჩართულობა 8 მარტის შეთანხმებასთან დაკავშირებით, პოლიტპატიმრების შეთანხმებასთან დაკავშირებით, ზოგადად მოწოდება, რომ არჩევნები იყოს თავისუფალი, ღია, გამჭირვალე, ძალადობისგან დაცლილი, რომ იყოს გარემო, სადაც მოსყიდვა არ ხდება, ეს ყველა პუნქტი არის ასახული ამ გადაწყვეტილებაში და ამ დისკუსიის ფარგლებში ამაზე იყო სწორედ საუბარი. ჩვენ ასევე ვნახეთ ქალბატონ ფონ კრამონის განცხადება, თუ როგორი საფრთხის შემცველია დიდი რესურსის მქონე მილიარდერის მხრიდან მართვა ისეთი ქვეყნის, როგორიც საქართველოა. ეს ყველაფერი კიდევ ერთხელ მიუთითებს იმას, რომ ჩვენი პარტნიორები მზად არიან იმისათვის, რომ საქართველოში მოხდეს დემოკრატიული ცვლილებები და ხელისუფლება შეიცვალოს, რათა ის პრობლემები, რომლებიც ახლდა წინა საარჩევნო სისტემას, რაც უკავშირდებოდა ძალადობას და სხვა ასეთ კანონდარღვევებს, აღარ იყოს მომავალში", — განაცხადა სერგი კაპანაძემ.

კაპანაძემ აღნიშნა, რომ თუკი ბიძინა ივანიშვილი შეეცდება იგივე მეთოდების გამოყენებას არჩევნებზე, რასაც ის წინა არჩევნებზე იყენებდა, ამას ექნება მკაფიო პასუხი როგორც ქართული საზოგადოების, ისე უცხოელი პარტნიორების მხრიდან.

"ჩვენი პარტნიორების მხრიდან ჩართულობა ძალიან მაღალია, ისინი დაინტერესებულები არიან, რომ გამოგზავნონ დამკვირვებლები ამ არჩევნებზე, ამრიგად, დარწმუნებული ვარ, რომ ვერანაირი ხრიკი, რაც ივანიშვილს შეიძლება ჰქონდეს, ვერ მოახდენს გავლენას არჩევნების შედეგზე და ის საბოლოოდ დამარცხდება ძალიან მწარედ. თუკი ივანიშვილი ჩაატარებს ისეთ არჩევნებს, რომელსაც თან ახლდება ძალადობა, მოსყიდვა და სხვა მძიმე კანონდარღვევები, როგორც ეს წინა არჩევნების დროს იყო და მოიტანს ისეთ შედეგს, რომელიც არ ასახავს ქართველი ხალხის რეალურ ნებას, ასეთ შემთხვევაში ამას შესაბამისი რეაგირება ექნება როგორც საქართველოს მოქალაქეების მხრიდან, ისე ჩვენი უცხოელი პარტნიორების მხრიდან", — განაცხადა სერგი კაპანაძემ,

სერგი კაპანაძე ასევე გამოეხმაურა ესპანელი ევროპარლამენტარის, ნაჩო სანჩესის განცხადებას, სადაც მან ოპოზიციის წარმომადგენლები გააკრიტიკა იმის გამო, რომ მათ არ მიიღეს მონაწილეობა არც საკონსტიტუციო და არც საარჩევნო ცვლილებების განხილვაში.

"ბატონი სანჩესი ცნობილია თავისი მხარდამჭერი განცხადებებით ქართული ოცნების მიმართ, ხოლო ის რომ არის სრულ უმცირესობაში, ეს ნათლად ჩანს გამომდინარე იქედან, თუ რა განცხადებებს აკეთებენ სხვა მისი კოლეგები. ბატონი სანჩესი როგორც ჩანს მეგობრობს ქართული ოცნების წარმომადგენლებთან და ამ განცხადებებს მათ საამებლად აკეთებს", — განაცხადა სერგი კაპანაძემ.

კაპანაძის თქმით, ეს ევროპარლამენტარი გამოირჩევა ქართული ოცნების მხარდამჭერი განცხადებებით და როგორც კაპანაძემ აღნიშნა, სანჩესი ამას ქართული ოცნების წარმომადგენლების საამებლად აკეთებს.