აფხაზეთის დე ფაქტო ჯანდაცვის უწყების ინფორმაციით, დღეს 14 სექტემბერს ოკუპირებულ აფხაზეთში კორონავირუსი კიდევ 18 ადამიანს დაუფიქსირდა. თუმცა, უცნობია, რამდენად ზუსტია ეს მონაცემები, რადგან საქართველოს ცენტრალურ ხელისუფლებას რეგიონიდან ზუსტი ინფორმაცია არ აქვს. მათივე ცნობით, ამ დროისათვის გუდაუთის საავადმყოფოში Covid-19-ის დიაგნოზით 62 ადამიანი მკურნალობს. 8 მათგანის ჯანმრთელობის მდგომარეობა მძიმეა, 19 პაციენტი საშუალო სირთულისაა, 2 სამკურნალოდ სოჭში გადაიყვანეს.

დე ფაქტო ჯანდაცვის სამინისტროს განმარტებით, ჯამში კორონავირუსი 674 ადამიანს დაუდასტურდა, მათ შორის 186 გამოჯანმრთელდა, გარდაიცვალა — 6.

რაც შეეხება ოკუპირებულ გალის რაიონში არსებულ ეპიდვითარებას, 14 სექტემბრის მონაცემებით, სოფელ საბერიოში კორონავირუსი კიდევ 5 ადამიანს დაუფიქსირდა. სამეგრელო-ზემო სვანეთის სახელმწიფო რწმუნებულის ადმინისტრაციის პრესსამსახურში On.ge-ს განუცხადეს, რომ პაციენტები ცენტრალური ხელისუფლების მიერ კონტროლირებად ტერიტორიაზე არსებულ სხვადასხვა საავადმყოფოში გადანაწილდნენ.

მათივე ინფორმაციით, 10 სექტემბრიდან, Covid-19-ს პირველი შემთხვევის დადასტურებიდან, დღემდე გალის რაიონში კორონავირუსის 56 შემთხვევა გამოვლინდა. მათი უმრავლესობა ამავე სოფელში მდებარე ჰიდროელექტროსადგურ ენგურჰესის თანამშრომელია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: