ევექსი ჰოსპიტლები ქვეყანაში მომატებული Covid 19-ის შემთხვევებთან დაკავშირებით განცხადებას ავრცელებს და სახელმწიფოს მიერ გამოყოფილი კლინიკების გადატვირთვის შემთხვევაში, 700-მდე საწოლის მობილიზებაზე სრულ მზაობას გამოთქვამს. პირველი ეტაპისთვის, კორპორაციამ ქ.თბილისსა და ქ. ქუთაისში სრულად აღჭურვილი 140-მდე საწოლი უკვე გამოყო.

მათი განცხადებით, თბილისში ტრავმატოლოგიური ჰოსპიტალისა და ქუთაისში, ქუთაისის რეფერალური ჰოსპიტალის სამედიცინო და ადმინისტრაციული პერსონალი ინფექციის კონტროლის შესაბამისი პროტოკოლების თანახმად გადამზადდა. აღნიშნულ კლინიკებში 13 სექტემბრიდან კორონავირუსით დაინფიცირებული პაციენტების მიღება უკვე დაიწყო. ევექსი ჰოსპიტლები კიდევ ერთხელ უხდის მადლობას ქსელში დასაქმებულ მედპერსონალს მოსახლეობის მხარდასაჭერად გამოხატული სრული მზაობისა და მაღალი პროფესიონალიზმისთვის.

ასევე, ჰოსპიტლებში სამედიცინო პერსონალი სარეზერვო გუნდებად დაკომპლექტდა და სამკურნალო პროცესში მათი ეტაპობრივი ჩართვა მოხდება. ჰოსპიტლებში მკურნალობის პროცესი სახელმწიფოს მიერ დამტკიცებული ეროვნული პროტოკოლის მიხედვით განხორციელდება.

ევექსი ჰოსპიტალების თქმით, 83 საწოლზე გაშლილი თბილისის ტრავმატოლოგიური ჰოსპიტალი არაინფექციური პროფილის პაციენტებისთვის დაიხურება, ხოლო ქუთაისის რეფერალურ ჰოსპიტალში ცხელებიანი პაციენტებისთვის 51 საწოლზე გაშლილი სრული ერთი სართული გამოიყო, სადაც პაციენტების მიღება დამოუკიდებელი შესასვლელიდან მოხდება და მათი მართვა იზოლირებულ ბლოკ პალატებში გაგრძელდება.

ქუთაისის რეფერალური ჰოსპიტალი არაინფექციური პაციენტებისთვის საჭირო სამედიცინო დახმარების აღმოჩენას ჩვეულ რეჟიმში, თუმცა პაციენტების მკაცრი ზონირების დაცვით განაგრძობს.

როგორც ევექსი ჰოსპიტლებში აღნიშნავენ, ერთ-ერთი პირველი სამედიცინო ქსელი იყო ქვეყანაში, რომელმაც კოვიდ 19-ის პანდემიის პირველივე დღეებიდან დაინფიცირებული პაციენტების სამართავად 6 მსხვილი ჰოსპიტლის გამოყოფაზე მზაობა გამოთქვა. დღეს საქართველოში მომატებული შემთხვევებიდან გამომდინარე კორპორაცია კვლავ მზადაა მოსახლეობის მხარდასაჭერად შესაბამისი ინფრასტრუქტურით და მედპერსონალით აღჭურვილი 700-მდე საწოლი ქვეყნის მასშტაბით გამოყოს.