ოსკარის ნომინანტმა მსახიობმა, მაიკლ ფასბენდერმა თაყვანისმცემლებს სამწუხარო ამბავი შეატყობინა. Time Out-თან საუბრისას მსახიობმა თქვა, რომ გადაღებებისგან ხანგრძლივ დასვენებას აპირებს და შესაძლოა, საერთოდ უარი თქვას მსახიობის პროფესიაზე.

კითხვაზე, თუ რას აპირებს მომავალში, მსახიობი პასუხობს, რომ ოკეანის ტალღებზე სერფინგით დაკავდება.

"ბოლო წლები ჩემთვის ძალიან აქტიური იყო. შეიძლება ითქვას, რომ ნამდვილი ვორკოჰოლიკი ვიყავი და ერთი ფილმის გადასაღები მოედნიდან ეგრევე მეორეზე გავრბოდი. ახლა მინდა, რომ მოვდუნდე და დავისვენო. ყველა მსახიობს აქვს აღმასვლის პერიოდი, რომელიც როდესაც პიკს აღწევს, უკუპროცესი იწყება. შესაძლოა, ჩემს კარიერაში ეს ეტაპი დადგა", - ასე ხსნის მსახიობი საკუთარ გადაწყვეტილებას.

მაიკლ ფასბენდერი ორჯერ იყო ნომინირებული ოსკარზე. პირველად 2014 წელს ფილმ 12 წელი მონობაში შესრულებული როლისთვის, ხოლო მეორედ - 2016 წელს სტივ ჯობსის როლისთვის. 2016-2017 წლებში მისი მონაწილეობით 5 ფილმის გამოსვლა იგეგმება.