ევროპული საქართველოს ლიდერმა, დავით ბაქრაძემ, ასპინძისა და ბორჯომის მოსახლეობას პარტიის მაჟორიტარობის კანდიდატი სამცხეში, ზურაბ ჩილინგარაშვილი წარუდგინა.

ზურაბ ჩილინგარაშვილის თქმით, სახელმწიფო ქონებაში არსებული მიწების ხალხისთვის გადაცემა მეტ კეთილდღეობას მოუტანს თითოეულ ადამიანს.

"უნდა მოხდეს სახელმწიფო ქონებაში არსებული მიწის გადაცემა ხალხისათვის, შენობები, რომლებიც სახელმწიფო საკუთრებაშია და ყოველწლიურად არის წამგებიანი, უნდა გადაეცეს ადგილობრივ მოსახლეობას. ევროპული საქართველო იქნება ამ მოსახლეობის კომპასი გარდამტეხი ცვლილებებისათვის. მე კი ვიქნები ამ ხალხის ხმა და წარმომადგენელი პარლამენტში, შევეცდები ყველანაირად დავიცვა მათი უფლებები", —განაცხადა ზურაბ ჩილინგარაშვილმა.

დავით ბაქრაძემ აღნიშნა, რომ ევროპული საქართველო, თავისი ხედვით, იქნება კომპასი გარდამტეხი ცვლილებებისთვის.

"ეს რეგიონი არის კიდევ ერთი მაგალითი იმის, რომ რაიონს ჰქონდეს მაღალი შემოსავალი და ხალხი ცხოვრობდეს ძალიან გაჭირვებულად. ამ ხელისუფლებამ უკან წაიყვანა ქვეყანა არასწორი მართვით და არაეფექტური ეკონომიკური პოლიტიკით. ევროპული საქართველო არის ის კვალიფიციური გუნდი, რომელიც იქნება კომპასი სწორი გზის მოსაძებნად და იმ გარდამტეხი ცვლილებების გასატარებლად, რომელიც ქვეყანას გამოიყვანს ეკონომიკური კრიზისიდან და მოაგვარებს იმ პრობლემებს, რომელიც დღეს აწუხებს მოსახლეობას", — განაცხადა დავით ბაქრაძემ.