ევროპული საქართველოს წევრი, რუსთავის მაჟორიტარობის კანდიდატი, ირმა ნადირაშვილი, საერთაშორისო გამჭვირვალობა საქართველოს კვლევას ეხმაურება, სადაც ქართული ოცნების მაჟორიტარების სამეწარმეო საქმიანობასა და პარტიულ შემოწირულობებზეა საუბარი.

ირმა ნადირაშვილის თქმით, ქართული ოცნება ზრუნავს არა ხალხის კეთილდღეობაზე, არამედ საკუთარი პარლამენტარებისა და მათი ოჯახების გამდიდრებაზე. ნადირაშვილმა აღნიშნა, რომ სწორედ ეს არის ქართული-ჯიგრული კორუფცია, რომელზეც პრემიერ მინისტრი გიორგი გახარია საუბრობდა.

"ეს კვლევა კიდევ ერთხელ ადასტურებს იმას, რაზეც მუდმივად ვსაუბრობთ: ქართული ოცნება ზრუნავს არა იმაზე, რომ ხალხი იყოს ნაკლებად ღარიბი, არამედ ზრუნავს საკუთარ ოჯახებზე და საკუთარ პარლამენტის წევრებზე. ზრუნავენ არა იმაზე, რომ ხალხს დარჩეს მეტი ფული, არამედ იმაზე, რომ მათ ოჯახებს დარჩეთ მეტი ფული. ეს არის ტრადიციული სქემა, რომელსაც "ოცნება" იყენებს, იგებენ ტენდერებს, ერთ პირთან მოლაპარაკებებით აფორმებენ ხელშეკრულებებს და შემდეგ თავისი შენაწირი შეაქვთ ქართული ოცნების ყულაბაში. ეს არის სწორედ ჯიგრულ-ქართული კორუფცია, რომელზეც გვესაუბრებოდა პრემიერ მინისტრი. სავარაუდოა, რომ ახალი წევრების უმრავლესობაც ფულის ნიშნით არის შერჩეული", — ირმა ნადირაშვილი.